Roja 1emîn a 12emîn Mîhrîcana Girê Koxê ku piştî 12 salan hat li daexistin bi stranên hunermendan ên cihêreng, bi coşeke mezin bi dawî bû.
Mîhrîcana Girê Koxê ya 12emîn a ji aliyê Şaredariya Gimgimê ve bi dirûşma “Bi hêza hunerê dê aştî bê welatê rojê” tê lidarxistin bi axaftina Hevşaredarê Gimgimê Giyasetîn Aydemîr û bi konserên hunermend Navdar Denîz, Firat Guneş û Dodan li meydana Koxê bi tevlîbûna bi hezar welatiyan berdewam kir.
‘Em bawer in pêvajoyê çareseriyê bi xwe re bîne’
Berî ku konser dest pêbikin Hevşaredarê Gimgimê Giyasetîn Aydemîr di derbarê mîhrîcanê de axaftinek kir. Giyasetîn Aydemîr diyarkir ku ji ber qedexeyan ew 12 sal bûn nikaribûn mîhrîcanê li darbixin û got: “Mîhrîcan çand e, ziman e, xweza û huner e. Hûn jî dizanin îro pêvajoyek dewam dike. Em bawer in ev pêvajo dê çareseiyekî bîne Rojhilata Navîn. Ew jî bi saya Birêz Abdullah Ocalan e”
Piştî axaftina Giyasetîn Aydemîr konserên Navdar Denîz, Firat Guneş û Dodan dest pêkir. Hunermendan bi reng û şêweyên xwe bi hezaran welatiyên ku qada mîhrîcanê tije kiribûn, kêfxweş kirin. Hunermendan bi zaravayên Kurdî kurmancî û kirmanckî stranên xwe û yên gelêrî ji bo beşdaran strîn. Heta derengiya şevê beşdaran li ber stranên cihêreng govend gerand. Roja 1emîn a mîhrîcanê bi konsera Dodan bi dawî bû.
Bernameya sibê
Mîhrîcan dê sibê bi pêşengeh, guhdariya helbestan, panel, atolyeya boyaxkirinê ya zarokan, sînevîzyona li ser têkoşîna li dijî JESan û konserên Bîlge Rozeyy, Eylul Nazlier û Sîpan Xelat berdewam bike.
