Li Parka Mîmozayê ya li taxa Barişê ya navçeya Peyasê ya Amedê di pêşengtiya Platforma Şiyar Be de li dijî hişbir û fihûşê civîna gel hate lidarxistin. Aktîvîsta TJAyê û siyasetmedar Ayla Akat di civînê de diyar kir ku ew ê bi hemû rêxistinên civakî yên sivîl re bi şîara “Rabin” dê zêdetir çalakiyan li dar bixin.
Platforma Şiyar Be ku li dijî tiryak û hişbirê têkoşînê dimeşîne, li Parka Mîmozayê ya li taxa Barişê ya navçeya Peyasê ya Amedê civîna gel lidar xist. Aktîvîsta TJAyê Ayla Akat Ata, Hevşaredarê Peyasê Cengîz Dundar, Hevberdevkê Platforma Şiyar Be Murat Kan, nûnerê saziyên sivîl û nişteciyên taxê tevli civînê bûn.
‘Em xwe wekî hêza çareseriyê nebînin, em nikarin tu encamê jî bigirin’
Ayla Akat Ata da zanîn ku ew kesî li derveyî vê xebatê nabînin û wiha got: “Her kes di nava vê xebatê de ye. Lê em dixwazin ku em hemû bi hev re vê pirsgirêkê çareser bikin. Eger em xwe wekî hêza çareseriyê nebînin, mixabin li hemberî vê pirsgirêkê û hilberînerên vê pirsgirêkê em nikarin tu encamê jî bigirin. Hevalên me yên ciwan, ciwanên vî bajarî hefteya çûyî li Batikentê nobet girtin. Îro temenê bikaranîna hişbirê heya 9 salî daketiye, ev pirsgirêk e.”
‘Heger kontrol hebûya dê malbatên me yê xwe di nav ewlehiyê de hîs bikirana’
Ayla Akat Ata diyar kir ku ev pirsgirêk ya hemû sazî û dezgehên civakî û rayedarên bajêr e û divê ev pirsgirêk were çareserkirin û ev tişt gotin. “Îro pirsgirêka sereke ya vê bajarê ew e ku rêjeya bikaranîna hişbirê ew qas berbelav bûye, zext li zarokên me, zarokên me yên 9 salî tê kirin ku hişbirê bi kar bînin. Heger li vê bajarê kontrol hebûya dê di vê parkê de malbatên ku digerin, rûdinên, çaya xwe vedixwin yê xwe di nav ewlehiyê de hîs bikirana. Duh li taxa Korhatê jinan ev tişt ji mere got, “Parkan bigirin.” Gotin, “Cihên lîstikê yên zarokan rakin.” Ez li vê bajarî hatime dinê, li vê bajarî mezin bûme lê ji me her tim daxwaza vekirina parkan dihate kirin. Yekem care tê gotin ku parkan bigirin. Yekem care tê gotin ku cihên lîstikê yên zarokan xera bikin, ji vir rabikin. Lewre ew cih veguheriye cihê hişbirê. Ji bo ew kesên hişbirê bikar tînin. Îro Navenda Têkoşîna li Dijî Maddeyê ya Şaredariya Bajarê Mezin dixebite. Di aliyê rehabilitasyonê de bi AMATEMê re, bi ÇAMATEMê re hevkarî dike. Armanca Bajarê Mezin ew e ku navendeke mezin ava bike ku xizmetê bide herêmê.”
‘Heya em hemû bi hev re nebêjin ‘Rabin’ em nikarin bibin hêza çareseriyê’
Ayla Akat Ata anî ziman ku ev têkoşîna li dijî hişbirê ne di bin destê tu partiyeke siyasî, rêxistineke civakî sivîl de ye û axaftina xwe wiha bi dawî kir: “Ji ber vê yekê em wekî Platforma Şiyar Be vê xebatê dikin. Biryara ku şaredariyên me girtine pir girîng in û veguherandin biryareke rêgezî. Hefteya bê dê hemû rêxistinên civakî yên sivîl, pêkhateyên Şiyar Be bi şîara ‘Rabin’ xebatên xwe berfireh bikin. Lê heya em hemû bi hev re nebêjin ‘Rabin’ em nikarin bibin hêza çareseriyê. Îro em li vir in, sibê em ê li parkeke din bin û pêngava ‘Rabin’ bidine nasîn. Em ê ji bo zarokên xwe û ji bo pêşeroja xwe rabin ser piyan.”
‘Îro civaka me bi pirsgirêke mezin re rû bi rû ye’
Hevşaredar Cengîz Dundar da zanîn ku ew ê ji bo bibin dengê pêngava ‘Rabin’ her tim di nav xebatan de bin û ev tişt gotin: “Îro civaka me bi pirgirêke mezin re rû bi rû ye. Fihûş, hişbir û tiryak pirsgirêkek mezin a civakê ye. Pergala kapîtalîst civakekê bi van tiştên qirêj dixwaze ji çand û jiyana wê veketîne. Em wek şaredariyên Dem Partiyê dê her tim di nav xebatan de bin û ji bo çareseriya vê pirsgirêkê dê têkoşîna xwe xurttir bikin.”
Piştî bernameyê serdana qehweyên taxê kirin û gel hişyar kirin. Bername piştî serdanê bi dawî bû.
