Rejîma Îranê zextên yên li ser jinan didomîne. Rejîmê li bajarên cûda yên Îranê 10 jin binçav kirin û jinek jî birîndar kir.
Komîsyona Jinan a Encûmena Nîştimanî ya Parastina Îranê, di derbarê zextên rejîma Îranê yên li ser jinan de agahiyên nû parve kir. Li gor agahiyên hatine pervekirin, di du rojên borî de leşker û milîsên rejîma Îranê bi cilên sivîl bi ser beşa wargeha jinan (yurd) a Zanîngeha Nîştimanî ya li Tehranê de girtin. Sê xwendekarên jin li gel Sekretera Encûmena Xwendekarên Kolêja Yasa û Zanistên Siyasî Serîra Kerîmî binçavkirin.
Leşkeran avêtin ser zanîngehê jî
Hat diyarkirin ku xwendekara zanîngehê û girtiya berê ya siyasî Mehşad Keşanî dema ku li bajarê Esfehanê tevlî xwepêşandanê bûye, ji aliyê hêzên Îranê ve hatiye binçavkirin. Li gor heman agahiyê, Mehnaz Qasimî ya xelkê bajarê Gîlan ku li bajarê Reşt dimîne, dema tevlî xwepêşandanan bûye, ji aliyê hêzên Îranê ve hatiye binçavkirin.
Jin û zorokan girtin û îşkence li wan kirin
Li navçeya Sebzewarî ya ser bi parêzgeha Xuzistanê jî jinên ciwan yên bi navên Nazenîn Zehra (17) û Zehra Mehdewî (17) hatine binçavkirin û şandine girtîgeha Meşhedê. Hat diyarkirin ku li bajarê Kerec jî du çalakvanên mafên jinan yên bi navên Yekta Derzade (20) û Suheyla Hîcab ji aliyê hêzên rejîmê ve bêy fermana dadwer hatin binçavkirin û di dema binçavkirinê de êşkence li wan hatiye kirin. Hat gotin ku her du jin şandine girtîgeha Kerecê.
Gule barandin û jinek birîndar kirin
Di dema xwepêşandanên li navçeya Fars a li parêzgeha Çar Mehel hêzên rejîmê gule li xwepêşanderan barandin. Di encamê de jina ciwan Sexer Îtimadî ji serê xwe bi giranî birîndar bûye û rakirine nexweşxaneyê. Hatiye eşkerekirin ku di dema xwepêşandanan de jina bi navê Zehra Îzdinya (26) a xelkê navçeya Yasuc Kuhgiluye, her wiha jina bi navê Boyer Ehmed hatine binçavkrin û şandine girtîgeha Yasuc.
Heta niha bi sedan welatiyên Kurd û Îranî hatin girtin û binçevkirin
Xwepêşandan roja 28ê Kanûna 2025an li Rojhilatê Kurdistan û Îranê ji ber qeyranên aborî, siyasî û civakî li dijî rejîma Îranê destpêkir. Hêzên rejîmê jî mîna her carê bi girtin, gulebaran û êşkenceyê êrişê xwepêşandêran kir. Li gor agahiyan heta niha bi sedan welatiyên Kurd û Îranî hatine binçavkirin û gelek kes jî di xwepêşandanan de hatine kuştin.
