Xizmên windayan û ÎHDê di hefteya 858emîn de çalakiya “Bila winda bên dîtin û faîl bên darizandin” berdewam kir. Di çalakiyê de aqûbeta Recep Îkîncîsoy pirsîn.
Xizmên windayan û Şaxa Komeleya Mafê Mirovan a Amedê (ÎHD), ji bo li aqûbeta windayan bipirsin û faîl bên darizandin di hefteya 858emîn de çalakiya “Bila winda bên dîtin û faîl bên darizandin” li Parka Koşûyolû ya Amedê li dar xistin. Vê hefteyê aqûbeta Recep Îkîncîsoyê 18 salî pirsîn. Xizmên windayan û endamên ÎHDê li parqê kom bûn û weneyên kesên hatine winda kirin hildan. Di çalakiya 858emîn de endam û rêveberên saziyên civakî, xizmên windayan û gelek kes tev li bûn. Li vir ewilî rêveberê ÎHDê yê Amedê Yakûp Guven axivî.
‘Biryara Doza Kobanê siyasiyê’
Yakûp Guven diyar kir ku bi salan e çalakiyê berdewam dikin û got: ““Em dixwazin ku di nava hiqûqê de kiryar bên darizandin û kesên hatina windakirina werin dîtin. Hefteya borî Dadgeha Mafê Mirovan a Ewrupayê ji bo kesên ji Doza Kobaniyê hatine girtin biryara berdanê da. Lê dadgeh vê biryarê redkir. Ew mûdehela doze ye. Biryar siyasî ye. Divê demildest kesên girtî bên berdan.”
Her roj polîsan ew dişopand
Rêveberê ÎHDa Amedê Firat Akdenîz jî serpêhatiya Recep Îkîncîsoy xwend. Firat Akdenîz diyar kir ku Recep Îkîncîsoy 18 salî bû û wiha axivî: “Li Amedê bi malbata xwe re dijiya. Recep di nav amadekariyên zewacê de bû. Her roj polîs û kesên sivîl Recep Îkîncîsoy dişopandin û gef lê dixwarin. Polisan berî ku Recep birevînin çend caran hewl da ku birevînin. Lê ji xwe destê polîsan rizgar kiribû. Di 16 Tirmehê 1980an de wext Meha Remezanê bû Recep piştî fitarê çû dikana xwe. Dema ku vedigeriya mala xwe di rê de li gorî kesên bûyer dîtine di seat 23.00an de kesên ku cilê sivîl li xwe kiribûn ew revandin. Kesên ku bûyer dîtin agahî dan malbata Îkîncîsoy, malbat ji midûriyeta polisan û dadgehê re serledan kir. Lê tu biryar derneket. Polîsan înkar kir û gotin Recep ne gel wan e.”
Daxuyanî bi çalakiya rûniştinê bi dawî bû.
