Platforma Ked û Demokrasiyê ya Amedê derbarê ‘Betalkirina Teqez’ a ji bo CHPê hatiye girtin de daxuyanî da çapemeniyê. Daxuyaniyê de hat gotin ku di vê pêvajoya krîtîk de ku pêdiviya welat bi bangên Aştî û Civaka Demokratîk heye, tişta em jê re hewcedar in, têkoşîna hevpar û avakirina aştiya civakî ye.
Platforma Ked û Demokrasiyê ya Amedê derbarê ‘Betalkirina Teqez’ a ji bo CHPê hatiye girtin de li Parka Roboskiyê ya li Dîclekenta Amedê daxuyanî da çapemeniyê. Endam û nûnerên platfromê, saziyên sivîl, siyasetmedar û gelek kes tevlî daxuyaniyê bûn. Daxuyanî ji hêla endamê platformê Behçet Barut ve hat xwendin.
Behçet Barut da zanîn ku tabloyeke giran a antîdemokratîk xwe daye xuya kirin û wiha got: “Ev tablo ji bo me ne nû ye. Bi dehan sal in siyasetmedarên Kurd bi destê qeyûman ji wezîfeyên xwe yên ku pê hatine hilbijartin hatin dûrxistin. Şaredariyên ku bi dengên gel hatibûn qezenckirin, bi tayînkirina qeyûman îradeya gel hat desteserkirin; siyasetmedarên hilbijartî, parlamenter û hevserokên şaredariyan bi dehan salan di girtîgehan de hatin girtin, hatin darizandin û hat xwestin ku werin bêdengkirin. Tevî biryarên berdanê yên Dadgeha Mafên Mirovan a Ewropayê (DMME) yên ji bo Demîrtaş, ew hîn jî di girtîgehê de tê girtin. Bi hezaran şaredar, endamên meclîsê û rêveberên partiyan ên hilbijartî hatin darizandin. DBP, HDP û HEDEP bi dozên girtinê û fişarên siyasî gelek caran hatin dorpêçkirin. Tevî van hemûyan jî gel nehat bêdengkirin û têkoşîn bidawî nebû. Biryarên Dadwerî Tehdîda Li Ser Pêşeroja Demokratîk in. Em mudaxeleyên darazê yên li ser partiyên siyasî tenê wekî meseleyeke partiyekê nabînin. Ev mudaxele gefek li ser pêşeroja demokratîk a welêt e. Îro heman rêbaz li dijî CHPê jî tên bikaranîn.”
‘Pêkanînên antîdemokratîk baweriya civakê ya bi demokrasiyê hejandiye’
Di daxuyaniyê de Barut anî ziman ku dadgeh li gorî telîmatên siyasî biryaran hildiberînin û wiha pêde çû: “Li ser îradeya ku bi hilbijartinê hatiye qezenckirin qeyûm tê tayînkirin. Ev rewş hiqûqê vediguherîne amûreke fişarê û bi awayekî fiîlî hewl dide muxalefetê tune bike. Biryara ‘Betalkirina Teqez’, ragihandina fermî ya wê yekê ye ku li vê pênûsê êdî ewlehiya hiqûqî ya tu sazî, tu kes û tu îradeyeke siyasî nemaye. Bi darê zorê yê polîsan, bi gaz û gopalan avêtina ser avahiya navenda giştî, tê wateya binpêkirin û tepisandina muxalefetê bi rêya şîdetê. Dema ku pirsgirêk dikaribû bi vekirîgirtina kanalên diyalog û lihevkirinê bihata çareserkirin, dîmenên ku derketin holê derb li siyaseta demokratîk xist û civak hîn bêtir polarîze kir. Ev pêvajoya ku tê xwestin bi destê darazê were sêwirandin û muxalefetê vediguherîne amûreke fişar û tasfiyeyê, derbeke mezin li aştiya civakî xistiye. Di van rojên ku em behsa pêvajoya aştî û civaka demokratîk dikin de, pêkanînên antîdemokratîk ên ku diqewimin, baweriya civakê ya bi demokrasiya li welat hejandiye. Di welatekî ku demokrasî lê tune be û derbe li demokrasiyê hatibe xistin de, avakirina civaka demokratîk û komara demokratîk wê bikeve xetereyê.”
Her wiha Behçet Barut destnîşan kir ku ew li dijî pêkanînên bêdeng namînin û wiha dawî daxuyaniya platformê anî: “Ji ber vê yekê, îro li hemberî vê êrîşa qeyûman a li ser CHPê, em nikarin bêdeng bimînin û tenê temaşe bikin. Em ê li hemberî pêkanînên faşîst bêdeng nemînin. Di têkoşîna Ked, Demokrasî û Aşitiyê de em bi êrîşên mezin û berdêlên mezin re rû bi rû man. Li hember kê dibe bila bibe em ê li dijî êrîşên bi vî rengî bêdeng nemînin. Bi milyonan mirovên ku di nav xizanî û bêçaretiyê de têne mêtin hene û li aliyê din ve kêmneteweyeke biçûk heye ku ji vê sefaletê feydeyê werdigire. Bedela gotina gotinekê, birêxistinbûnê û kirina siyaseta demokratîk; lêpirsîn, doz û girtîgeh e. Banga Têkoşîna Hevpar û Aşitiya Civakî Gelê me yê hêja, Demokrasî mafê birêxistinbûna gel e, azadiya raman û xweîfadekirinê ye, têkoşîna sendîkayî ye, daxwaza wekheviyê ya jinan e, têkoşîna pêşerojê ya ciwanan e û vîna gelan a ji bo jiyana bi hev re û di nav aşitiyê de ye. Ev pêla êrîşê çi CHPê, çi jî partiyeke din bike hedef, em siyaseta demokratîk diparêzin. Em bi dehan salan e vê têkoşînê dimeşînin. Em bi tenê meşiyan, me berdêl da, lê me dev jê berneda. Îro ev têkoşîn, têkoşîneke hevpar e. Tu kes nikare darazê, hêzên ewlehiyê û derfetên dewletê ji bo afirandina civakeke bê muxalefet bi kar bîne. Di vê pêvajoya krîtîk de ku welat pêdiviya wî bi bangên Aştî û Civaka Demokratîk heye, tişta ku em jê re hewcedar in, têkoşîna hevpar û avakirina aştiya civakî ye.”
Daxuyanî piştî dirûşm û çepikan bi dawî bû.
