Platforma Ked û Demokrasiyê ya Amedê piştgirî da peyama Rêberê Gelê Kurd Abdullah Ocalan û got: “Banga Rêberê Gelê Kurd Abdullah Ocalan dê bibe derfeta avakirina aştiyek demokratîk û mayînde. Divê gelên Tirkiyeyê û hemû beşên civakê ji serkeftina vê pêvajoyê berpirsyar bin.”
Platforma Ked û Demokrasiyê ya Amedê têkildarê peyama Rêberê Gelê Kurd Abdullah Ocalan li Qada Şêx Şêîd (Deriyê Çiyê) daxuyanî da. Rêxistinên DEM Partî, DBP, TJA ên Amedê û gelek nûnerên saziyan beşdarî daxuyaniyê bûn.
‘Divê dewlet gav bavêje’
Hevseroka Gişti ya OHDê Ekîn Yeter diyar kir ku peyama Rêberê Gêlê Kurd Abdullah Ocalan ji bo rojhilata navîn derfeteke dîrokî ye û got: “Modernîteya kapîtalîst pêvajoyeke antîdemokratîk li Rojhilata Navîn pêşdixe. Heta niha gelê kurd çawa ku li hember wan polîtîkayan li ber xwe da û demokrasî pêşxistibe dê ji îro û şûn ve jî vê têkoşîna xwe bidomîne. Çanda jiyana hevpar bi polîtîkayên red înkar, asimilasyonê ne pêkan e. Pêwîste siyaset demokratîk bibe, çanda demokrasiyê pêşbikeve. Em ji bo vê amade ne. Divê dewlet jî gavên pêwîst bavêjin.”
‘Pêxember jî ji bo aştiyê xebitîne’
Berdevkê DÎKê Mehmet Emîn Ay jî da zanîn ku Rêberê Gelê Kurd Abdullah Ocalan bi peyama xwe ye dîrokî peywireke girîng daye pêşiya wan û got: “Hemû qasîd, pêxember jî ji bo aştiyê xebitîne. Ji bo ku înkar asimilasyon qirkirin heye, şer jî heye. Encama vê jî qeyrana siyasî û abori ye. ji ber vê jî peyama Abdullah Ocalan çareserî ye. Divê sedemên şer û pevçûnan ji holê bêrakirin. Divê parlemento demildest zemîna hiqûqî ava bike. Em wek însanên oldar heta dawiyê li dijî niheqiyan têbikoşin.”
Hevserokê Şaxa SESê ya Amedê Mehmet Nûr Ulus ji li ser navê Platforma Ked û Demokrasiyê daxuyanî da û wiha got: “Berhema têgihiştineke ku pirnasname û pêkhateya pirçandî ya Tirkiyeyê, bi taybetî jî pirsgirêka Kurd ji nedîtî ve tê. Vê ferasetê rê li ber avakirina jiyaneke wekhev û azad a di navbera gelan de girtiye û bi polîtîkayên çewisandin û înkarê naskirina nasnameyan bêdeng kiriye. Çareserkirina pirsgirêka Kurd ne bi şer û asîmîlasyonê, divê bi rêyên demokratîk û aştiyane bên çareserkirin.”
‘Banga Rêberê Gelê Kurd derfeta aştiyek demokratîk û mayînde ye’
Mehmet Nûr Ulus da zanîn ku banga Rêberê Gelê Kurd Abdullah Ocalan di 27ê Sibatê de ji bo çareseriya Pirsgirêka Kurd hêviyeke nû afirand û got: “Banga Rêberê Gelê Kurd Abdullah Ocalan ne tene nexşeya pevçûnan bi dawî dike, di heman demê de dê bibe derfeta avakirina aştiyek demokratîk û mayînde. Divê gelên Tirkiyeyê û hemû beşên civakê ji serkeftina vê pêvajoyê berpirsyar bin.”
‘Em bi biryarin’
Mehmet Nûr Ulus herî dawî diyar kir ku wek Platforma Ked û Demokrasiyê ya Amedê û hemû saziyên demokratîk ên herêmê li ser rêya aştî û demokrasiyê bi biryar in û got: “Em ê hemû bi hev re pêşerojeke ku mirov azad bijîn, ziman û nasnameyên wan bên naskirin, maf û azadiyên wan bên garantîkirin ava bikin.”
