Enqere – Pismamê girtiyê nexweş Tuncer Saglam ku di 7ê mijdarê de jiyana xwe ji dest da Ercan Saglam ku tevlî çalakiya ji bo berdana girtiyên nexweş bû diyar kir ku pismamê wî ji ber îhmalên rêveberiya girtîgehê jiyana xwe ji dest da ye û got: “Me ew êş kişandiye lê em naxwazin tu malbatên me vê êşe bikêşin. Ji bo wê jî em dixwazin girtiyên me yên nexweş hemû bên berdan.”
Li girtîgehan sepanên binpêkirina mafan li dijî girtiyên siyasî bê navber didomin. Girtiyên nexweş tevî ku nexweşiya wan girane û nikarin pêdiviyên xwe bi serê xwe dabin bikin jî nayên berdan û Rêveberiya Çavderiyê ya Girtîgehan berdana girtiyên siyasî asteng dike. Li gorî daneyên Komeleya Mafê Mirovan (ÎHD), li girtîgehan hezar û 412 girtiyên nexweş hene û ji wan 335 girtiyên nexweşiya wan girane, 230 girtî nikarin pêdiviyên xwe bi serê xwe dabin bikin û 188 girtiyên nexweş jî divê hertim di bin çavderiya tibbî de bin. Lê girtiyên nexweş tevî nexweşiya wan giranê jî nayên berdan û gelek girtî jî tevî “Rapora nikare” di girtîgehan de bimîne jî berdana wan ji aliyê rêveberiya girtîgehan ve tê asteng kirin.
Girtiyê nexweş Tuncer Saglam ku li Girtîgeha Wanê ragirtî bû tevî nexweşiya wî giran bû jî nehat berdan. Tuncer Saglam ku ji bo nexweşiya wî giran bû ew sewqî Girtîgeha Enqereyê hat kirin û li Nexweşxaneya Bajêr a Etîkê di 7ê Mijdarê de jiyana xwe ji dest da. Dîsa girtiya nexweş Evîn Zapsû ku li girtîgeha Kayseriyê ragirtiye piştî encamên bîopsiyê hat tespît kirin ku ew nexweşa penceşêra asta 4an e. Tevî rewşa Evîn Zapsû giran e jî ew careke din sewqî girtîgehê kirin û tevî nexweşiyên giran jî di girtîgehê de ragirtiye. Girtiya nexweş Newroz Bozkurt ku 28 salin girtiyê û Nexweşiya wê ya Lenfositik Losemî ya Kronîk (KLL) heye û ji ber rewşa wê giranbû di nexweşxaneya bajêr a Etîkê de tê tedawî kirin.
Ji ber rewşa girtiyên nexweş ji aliyê malbatên girtiyên nexweş, Komeleya Piştgiriya bi Malbatên Girtî û Hikumxwaran re (TUHAY-DER), Komeleya Hiqûqnasên Ji bo Azadiyê (OHD), Komeleya Mafê Mirovan (ÎHD) û DEM Partiyê ve li ber Wezareta Dadê çalakiya rûniştinê ya bêdem hat destpêkirin. Çalakiya bi daxwaza berdana girtiyên nexweş di roja 5an de berdewam dike. Malbatên girtiyên nexweş jî ji bajarên cuda tevlî çalakiyê dibin. Vê hefteyê malbatên girtiyên nexweş û Dayikên Aştiyê yên Stenbolê tevlî çalakiyê bûn, hefteya pêşiya me jî dê malbatên girtiyên nexweş ji Amedê werin Enqereyê û tevlî çalakiyê bibin. Malbatên girtiyên nexweş dor bi dor ewê bên Enqereyê û tevlî çalakiyê bibin.
‘Ji ber ku tedawiyeke baş nehat kirin jiyana xwe ji dest da’
Pismamê girtiyê nexweş Tuncer Saglam Ercan Saglam ku tevlî çalakiyê bû anî ziman ku ji ber pismamê wî tedawiyeke baş nedît jiyana xwe ji dest da û wiha axivî: “Ev 4 mehin ez bê navber ligel pismamê xwe li nexweşxaneyê me. Vê yekê bandoreke mezin li ser min kir. Hevalên me yên girtiyên nexweş Evîn û Newroz di van şert û mercan de di girtîgehê de bin dilê me rehet nabe. Hewceye em hertim di nava çalakiyan de bin ku hevalên me bên tedawîkirin û bigihêjin tenduristiya xwe. Divê hemû girtiyên nexweş bên berdan û li derve tedawiya xwe bibînin.
‘Me ew êş kişand em naxwazin tu malbatên me vê êşe bikêşin’
Ercan Saglam di berdewama axavtina xwe de diyar kir ku ji ber şert û mercên girtîgehê nexweşiya pismamê wî Ercan Saglam 5 mehan nehatiyê teşhîs kirin û wiha dirêjî da axaftina xwe: “Îhmaleke mezin hebû. Dibêjin me nexweşxane çêkirine lê di nexweşxaneyê de bijîşk tune ne, cîhaz tune ne. Tevî teknolojî ew qas pêşketiye jî lê di 5 mehan de nexweşiyek nehatiye teşhîs kirin, em bawerin li wir îhmalkarî heye. Ew îhmal çi ye? An paşguh kirine, an cîhazê wan tune ne û an jî nexweşxaneyên wan vala ne. Me ew êş kişandiyê lê em naxwazin tu malbatên me vê êşe bikêşin. Ji bo wê jî em dixwazin girtiyên me yên nexweş hemû bên berdan.”
‘Tevî rewşa giran jî xwestine ji nexweşxaneyê sewqî girtîgehê bikin’
Ercan Saglam nerazîbûn nîşanî hewldana rêveberiya girtîgehê da û wiha got: “Tevî ku rewşa heval Tuncer giran bû jî rêveberiya girtîgehê xwestin wî ji nexweşxaneyê bişînin girtîgehê. Servîsan ew qebûl nedikir. Digotin teşhîs nehatiyê kirin em nikarin bigirin. Ji ber ku hevalên me ketin dewrê ew şandin kampusa nexweşxaneyê ya girtîgehê. Piştî 4-5 rojan dîsa anîn nexweşxaneya bajêr a Etîkê. Bi vî halî jî digotin em ê wî bibin kawişa girtiyan. Me ew qebûl nekir û li ser vê yekê birin nexweşxaneyê û li wir jî jiyana xwe ji dest da.”
‘Bi van sepanan heviyên me jî dişkê’
Ercan Saglam di dawiya axavtina xwe de ji bo piştgiriya çalakiya ji bo berdana girtiyên nexweş bang li gel kir û wiha dawî li axavtina xwe anî: “2 salin pêvajoyek destpêkiriye. Bi vê pêvajoyê em bi hevî ne. Lê ew hesasiyeta pêvajoyê di girtîgehan de tune ye. Em dixwazin girtîgeh vala bibin û bi taybetî jî girtiyên nexweş demildest bên berdan. Bi van sepanan heviyên me jî dişkê. Banga me ji gelê me ew e ku heta girtiyên nexweş neyên berdan dest ji çalakiyan bernedin. Her tim li kolanan bîn, ji bo girtiyên nexweş şiyar bin û dengê xwe bilind bikin.”










