PFDKê bi hincetên cûr bi cûr 2 milyon û 542 hezar û 500 lîre cezayê pere li Amedsporê birî. Li ser vê yekê alîgirên Amedsporê jî banga piştevaniyê kirin.
Federasyona Futbolê ya Tirkiyeyê (TFF), biryarên Desteya Dîsiplînê ya Futbolê ya Profesyonel (PFDK) eşkere kirin. Li gorî biryara PFDKê, ji ber sedemên wekî di maça Beşiktaşê de temaşevan bi awayekî neqanûnî girtine nava stadyûmê, bûyerên qadê, pergala avdanê ya qadê ya ku bû sedema sekinîna lîstikê û neavdana hemû aliyên qadê ya bi awayekî wekhev, 2 milyon û 542 hezar û 500 lîre cezayê pere li Amedsporê hate birîn.
Li dijî cezayî banga alîkariyê kirin
Li ser vê yeke alîgirên Amedsporê jî li dijî cezayan kampanyaya piştevaniyê dan destpêkirin. Alîgirên Amedsporê derbarê kampanyayê de daxuyaniyeke wiha dan:
“Li dijî cezayên giran ên ku li kûluba me hatine birîn, niha dema wê ye ku em piştevaniya xwe hê mezintir bikin. Di pêvajoyeke wiha de ji bo em li kêleka Amedsporê bin, xwedî li kûluba xwe derkevin û vê evîna mezin bi hev re hilgirin ser milên xwe, niha em piştevaniyê mezin bikin. Ji ber ku em yek in, ji ber ku Amedspor em bixwe ne! Hûn dikarin bi serdana malpera kûluba me ya înternetê bi rêbazeke ku ji bo we guncav be piştgiriyê bidin Amedspora me.”
Kesên ku dixwazin piştgiriyê bidin Amedsporê, dikarin bi rêya malpera înternetê ya Amedsporê ya bi navê https://www.amedspor.com.tr/amedliol piştgiriyê bidin.
