Di pîrozbahiya Newroza Stenbolê ya 2011an de peyama Rêberê Gelê Kurd Abdullah Ocalan hate xwendin. Di peyama Abdullah Ocalan de hate gotin ku polîtikaya înkar û îmhayê ya 85 salan bi rê û rêbazên cuda hêj didomin.
Di pirozbahiya Newroza 2011an a Stenbolê ku zêdeyî 700 hezar kes beşdar bûn de bi hezaran posterê Rêberê Gelê Kurd Abdullah Ocalan hatin vekirin. Dîsa pankarta “Em hemû li dijî Dehaqan Kawa ne” vekirin. Li gelek nokteyên Newrozê agirê pîrozbahiye hate pêxistin. Di pîrozbahiyê de parêzerên Buroya Hiqûqa Asrîn, peyama Rêberê Gelê Kurd Abdullah Ocalan a ji bo Newrozê xwend. Dema peyam hate xwendin, girsê bi yek dengî dirûşmeyên “Bijî serok Apo” berz kir. Di peyama Rêberê PKK’ê Abdullah Ocalan de wiha hate gotin: “Dîroka Komara Tirkiyeyê ya 85 salan diroka komkujiyê ye. Îro jî ev polîtîka bi reng û rêbazên cuda didome. Têkoşîna gelê kurd rastiyek aşkere kir. Bi vê têkoşîna gelê kurd êdî kes nikare nasnameya gelê kurd înkar bike. Lê pirsgirêka hebûna gelê kurd hêjî dimome. Em dixwazin Neteweya Demokratîk ava bikin. Em dixwazin xweseriya demokratîk ava bikin. Em dixwazin hemû reng, ziman û çanda di bin baneya xweseriya demokratîk de li hev kom bikin. Ji bo çareseriya pirsgirêka kurd divê muzakere pêş bikevin. Sala 2011an dê bibe sala pêşketina çareseriyê. Ger ku ev rêbaz pêş nekeve dê serdema duyemîn a sala 2011an bibe destpêka serhildana gelê kurd. Lê bila ev yek baş bê zanîn ku ev rêbaza duyemîn ne daxwaza me ye. Em dixwazin pirsgirêkê bi rêbaza diyalog û muzakereyan çareser bikin.”
‘Newroz pêşeroja azadiya gelan e’
Abdullah Ocalan, di peyama xwe xwest di çarçoveya yekîtiya Demokratîk de her kes piştgiriyê bide çareseriya pirsgirêka kurd. Abdullah Ocalan, di berdewama peyama xwe de xwest her kes bi hestewarî nêzî Newrozê bibe û wiha berdewam kir: “Li Tirkiyeyê çareseriya pirsgirêka kurd tê wateya statuya kurdên li Îran û Suriyeyê. Newroz dê li Tirkiye û Rojhilata Navîn bibe azadiya gelan.”
