Tişta ku tê xuyakirin armanca êrîşa HTŞê ruximandina Rejîma Esad e. Ji xwe ji daxuyaniyên DYEyê ev yek bi zelalî hat dîtin.
Piştî hilbijartina Dewletên Yekbûyî yên Emerîkayê (DYE) şerê li Sûriyeyê careke din rû da. Vê carê bi taktîkên nû û dîsa bi armancên nû vî şerî rû da. Rêxistina bi navê Heyet Tehrîr el-Şam (HTŞ) di roja 27ê Mijdarê de berê xwe da Helebê û di nava du-sê rojan de Heleb ji Rejîma Esad sitand. Rejîma Esad bi tu awayî li ber xwe ne da û bi hêsanî ev der radestî HTŞê kir. Piştî ku Heleb hat bi destxistin HTŞê vê carê berê xwe da bajarê Hemayê û ev der jî ji Rejîmê sitandin. Niha jî di dorê de armanca wan Hums û Şam e.
Ji 2011an û heta niha şerê li Sûriyeyê bê navber didome. Piştî ku DAIŞ ji 2013an şûnde li Iraq û Sûriyeyê qada xwe mezin kir berê xwe dan destkeftiyên kurdan û gelê din. Herî dawî di meha tebaxa 2014de berê xwe dan Şengalê û xwest gelê êzidî di fermanek nû re derbas bike. Lê li vir bi hêza PKKê rû bi rû ma. Di meha Îlona heman salê DAIŞ’ê vê carê berê xwe da Kobanê û dîsa li vir jî bi vîna gelê kurd re rû bi rû ma şiketina xwe ya dîrokî jiya.
Piştî deh salan HTŞ jî wekî heman meşa DAIŞê ya destpêkê bera xwe da Helebê û ev der bi hêsanî bi dest xist. HTŞ ji aliyê Îngîltere û Erebîstana Sûidî ve tê fînanse kirin û ji aliyê DYE û Îsraîlê ve jî tê destekkirin. Ji xwe ku ne wisa bûya HTŞ’ê bi serê xwe ne dikarî êrîşê ewqas cih bike û Rejîma Esad qels bike.
Li aliyê din jî Artêşa Niştîmanî ya Sûriyeyê heye. Ev rêxistin jî ji aliyê Erdogan û AKP-MHPê ve tê fînansekirin. Lewre piştî ku HTŞê Heleb bi dest xist ev rêxistin bi talîmatên Erdogan û dewleta tirk êrîşê Şehba, Til Rifat, taxên Helebê yên Eşrefiyê û Şex Mexsûdê û êrîşê kurdan û HSDê kir.
Tişta ku tê xuyakirin armanca êrîşa HTŞê ruximandina Rejîma Esad e. Ji xwe ji daxuyaniyên DYEyê ev yek bi zelalî hat dîtin. Ji ber wê jî di destpêka êrîşan de HTŞ bi Arteşa Nistîmanî ya Sûrîyeyê re tevger kir. Lê ev rewş wê demkî an jî mayînde be dê di nava pêvajoyê de zelal bibe.
DYE û Israîl di şexsê Rejîma Esad de dixwaze hêza Îran û Rûsyayê di Sûriyê de qels bike. Di êrîşên Israîlê ya li dijî Hizbillah ya li Lubnanê jî armanc qels kirina Îranê bû. Niha jî dixwazin li Sûriyeyê jî vê rewşê pêk bînin. Lewre ji bo wê jî hem li Lubnan hem jî li Sûriyeyê pevajoyek nû dest pê dike.
Bi êrîşa HTŞê ya li dijî Rejîma Esad tê xuya kirin ku DYE û Israîl dixwazin li Sûriyeyê HTŞ bibe desthilat. Niha jî bingeha vê rewşê tê avakirin. Li vir jî du pirs dikevin serê mirov de. Yek: Heke HTŞ bibe desthilatdar wê tifaqa xwe Artêşa Niştîmanî ya Sûriyeyê re berdewam bike an na? Du: Wê bi kurdan ango bi HSDê re şer bike an jî wê di pêvajoyek siyasî de li hev bikin? Her du pirs jî ji bo pêşeroja Sûriyeyê û pêvajoyek nû girîng in. Lewre di daxuyaniya çapemeniyê de Fermandarê Giştî yê HSDê Mezlûm Ebdî destnîşan kir ku heta niha do navbera wan û HTŞê de şer rû ne daye û banga çareseriya siyasî kir.
Di pêvajoya siyasî ya li Sûriyeyê de cihê Erdogan û çeteyên wî yên SMOyê nîn e, ev teqez e. Ev rewş wê di demê pêş de zelalî bê dîtin. Lewre şerê li Sûriyeyê desthilatdariya Erdogan qels kir û ji ber wê jî ewqas bi xwesteke ku destkeftiyên kurdan yên li vir tune bike. Bi xeyalên osmanî yên nû ket di nava dergûşa Sûriyeyê de. Lê ev xeyalên wî di gewriya wî de dimîne. Dê HSD gurzê Kawayê Hêsinkar li Erdogan bixe û hem wê herêmên dagirkirî ji çeteyên wî rizgar bike hem jî wê desthilatdariya faşîst a AKP-MHPê têk bibe.
