Partiyên siyasî û rêxistinên civakî yên Wanê li dijî êrîşên Tirkiyeyê yên li ser Rojava daxuyanî dan. Hevseroka DBPê ya Wanê Gonul Ûzûnay destnîşan kir ku Rojava ji bo wan îmtîhanek e û got: “Eger ew vê ezmûnê derbas nekin, dê gelê kurd wan samîmî nebîne. Gelê kurd êdî yek dil û yek ruh e.”
Partiyên siyasî û saziyên sivîl ên li Wanê, li dijî êrîşên li ser sivîlên li Bendava Tişrînê ya li Bakur û Rojhilatê Sûriyeyê li ber avahiya Partiya Wekhevî û Demokrasiyê ya Gelan (DEM Partî) daxuyanî dan. Girseyê pankartên “Em aşitiyeke birûmet diparêzin û êrîşên li ser qadên sivîlan pêk tên şermezar dikin” û “Rojava em in, em ji bo rojava dimeşin” vekirin. Meclîsa Dayikên Aştiyê, aktivîstên Tevgera Jinên Azad (TJA), hevşaredarê Bajarê Mezin ê Wanê Abdullah Zeydan, parlementerê DEM Partiyê yê Wanê Zulkuf Ûçar, hevserokên DBP û DEM Partiyê yên navend û navçeyan û nûnerên saziyên sivîl tev li daxuyaniyê bûn.
‘Pêwîst e gelê kurd bibe yek’
Hevseroka DBPê ya Wanê Gonul Ûzûnay diyar kir ku bi salane li Sûriyeyê gelek komkujî pêk tên û gelê herêmê û gelê kurd li dijî van komkujiyan li ber xwe dane û têkoşîna xwe dane meşandin. Gonul Ûzûnay, anî ziman ku sedsal berê li ser kaxezê gelê kurd û Kurdistan parçe kirin û got: “Lê gelê kurd yek dil, yek ruh e. Îro gelê kurd li hemû cîhanê xwedî li gelê Rojava derdikeve. Yên ku dest ji aştî û wekheviyê berdidin divê pêşî Rojava bibînin. Yên aştî û biratiyê dixwazin îro bi Rojava re bi ceribandina xwe ya herî mezin re rû bi rû dimînin. Rojava ji bo wan îmtîhanek e, ger di vê îmtîhanê de bi ser nekevin, gelê kurd destê dirêjkirî yê biratiyê samîmî nabîne. Çawa ku gel li hemû cîhanê nasname û mafên xwe diparêze, gelê Rojava jî wê nasnameya xwe biparêze. Divê demildest êrîşên li Rojava û derdora Bendava Tişrînê bê rawestandin. Em careke din êrîşên li wir tên kirin şermezar dikin û banga rawestandina êrîşan dikin. Pêwîste gelê kurd ji her demê zêdetir bibe yek.”
‘Em ê li dijî komkujiyan dengê xwe bilind bikin’
Parlementer Zulkuf Uçar jî destnîşan kir ku gelê kurd gelê herî berxwedêr ê Kurdistan û Tirkiyeyê ye û wiha got: “Gelê kurd gelê herî polîtîk ê Rojhilata Navîn e. Yên ku li ser vê yekê li dijî gelê kurd tometbaran dikin, yên ku heta niha demokrasî û aştiyê neparastine, yên ku xwe dûr dixin bila dest ji hedefgirtina gelê kurd û DEM Partiyê berdin. Peyama ku birêz Abdullah Ocalan piştî demeke dirêj parve kir, hêviya aştiyê di milyonan mirovan de zindî kir. Lê yên ku vê hêviya aştî û demokrasiyê pir zêde dibînin, qetlîamên xwe yên li Rojava didomînin. Yên ku dixwazin vê hêviya aştiyê bişkînin, li welat polîtîkayên xwe yên qeyûm didomînin. Yên ku vê hêviya aştiyê ji bo gelê kurd û hemû gelên vî welatî zêde dibînin, her roj dest ji girtina xebatkarên çapemeniyê ku lêgerînerên heqîqetê ne, bernadin. Herî dawî 6 xebatkarên çapemeniyê yên li rastiyê digerin hatin girtin. Em ji vir wan bi rêzdarî silav dikin. Helbet me qetlîamên li Rojava ji bîr nekir, em ê ji bîr nekin. Em ê li dijî komkujiyên ku her roj diqewimin dengê xwe bilind bikin.”
Daxuyanî, bi dirûşmên “Bijî berxwedana Rojava” û “Şehîd namirin” bi dawî bû.
