Berdevka DEM Partiyê Ayşegul Dogan di panela ÎHDê de diyar kir ku divê êdî li ser mafên Rêberê Gelê Kurd Abdullah Ocalan were axaftin.
Li navçeya Cizîrê ya Şirnexê ji aliyê Komeleya Mafên Mirovan (ÎHD) a Şaxa Şirnexê, Baroya Şirnexê û Komeleya Hiqûqnasên ji bo Azadiyê (OHD) a Şaxa Şirnexê ve di çarçoveya Hefteya Mafên Mirovan de bi mijara “Pêşeroj, îroj û paşeroja mafên mirovan” panel hat lidarxistin. Berdevka DEM Partiyê Ayşegul Dogan, Hevserokê Giştî yê ÎHDê Cîhan Aydin, Parlamenterê CHPê yê Enqere Onûr Konûralp û Doç. Dr. Dîlan Mizrak û gelek welatî tev li panela li Eywana Konferansa Şaredariya Cizîrê bûn.
Di panelê de destpêkê Parlamenterê CHPê yê Enqere Onûr Konûralp bal kişand ser Pêvajoya Aştî û Civaka Demokratîk û wiha axivî: “Di bingeha binpêkirina mafan de pirsgirêka Kurd heye. Tişta herî zor pêkanîna aştiyê ye, îro pêvajoyek heye û em hewl didin tişta zor pêk bînin.Di vê pêvajoyê de êşên hatine kişandin divê neyê jibîrkirin. Me weke CHPê ji bo Komîsyona Meclîsê raporek 80 rûpel amade kiriye. Di vê raporê de 29 rûpel li ser demokratîkbûnî ye ê 4 rûpel bi pirsgirêka Kurd ve eleqeder e.”
‘Ji aştiyê wêdetir rêyek tuneye’
Berdevka DEM Partiyê Aşyegul Dogan jî diyar kir ku heya gelê Kurd xwe da qebûlkirin gelek berdêlên giran da û wiha axivî: “Ji bilî sazkirina aştiyê wêdetir rêyek me tuneye. Em hemû qala aştiyê dikin, qala mafan dikin, îro bi mîlyonan Kurd dibêjin birêz Ocalan vîna me ye, ev yek mafê wan e. Divê dewlet vê yekê qebûl bike êdî birêz Ocalan aktorê sereke ye. Heya ev neyê qebûlkirin famkirina rasteqîn jî pêk nayê. Ji îro pê ve divê em li ser mafên birêz Ocalan ên mirovî jî biaxivin.”
‘Agirê dilê dayîkan were vemirandin, dê aştî pêk were’
Hevserokê Giştî yê Komeleya Mafên Mirovan (ÎHD) Cîhan Aydin jî pêkanînên dewletê yên di salên 1990î de bi bîr xist û wiha got: “Divê dewlet biryarê bide, ka dê derbarê kiryarên salên 1990î de çi bibêje. Dewlet dê van kiryaran çawa bigire dest. Ger me agirê dilê dayîkan vemirand em ê bikaribin aştiyê pêk bînin. Ev yek jî bi mafên mirovan bi aştiyê pêk tê.
‘Divê dewlet ji mafên mirovan netirse’
Doç. Dr. Dîlan Mizrak jî di axaftina xwe de da zanîn ku biryara qedera xwe tayînkirin mafê herî sereke yê mirovan e û got: “Mafên mirovan ên bingehîn hene û ger di vê pêvajoyê de ev pêk neyên çareserî pêk nayê û pirsgirêkên girantir ê derbikevin. Hemû dewlet ji mafên mirovan ditirsin ya rast hewceyî bi tirsê nake û tişta herî baş mafên mirovan e.”
Piştî axaftinan panel bi pirs û bersivan bi dawî bû.
