Komîseriya Bilind a Mafên Mirovan a Neteweyên Yekbûyî (NY) ragihand ku li Îranê ji destpêka sala 2025an û vir ve herî kêm 841 kes darve kirin.
Li gorî daneyên Neteweyên Yekbûyî, Rejîma Îranê di meha Tîrmehê de herî kêm 100 kes darve kirin; ev yek li gorî heman meha sala derbasbûyî tê wateya zêdebûna bi 2 qatî.
Di nava kesên hatin darvekirin de gelek jin, koçberên ji Efganistanê, mirovên Belûc, Kurd û Ereb hebûn. Berdevka NY’yê Ravina Shamdasani anî ziman ku li Îranê darvekirin weke ‘amûreke tepisandina muxalefetê’ tê bikaranîn û bi taybetî mirovên ji komên cuda yên etnîkî û koçber hedef têne girtin. Di daxuyaniyê de hate ragihandin ku xeteriya înfazê li ser 11 mehkûman heye. Yek ji wan bi hinceta endametiya Rêxistina Mucahîtên Gel (MEK) bi sûcdariya ‘raperîna bi çekdarî’, pênc jî ji ber dozên têkildarî çalakiyên şermezarkirinê yên sala 2022’an bi darvekirinê hatin mehkûmkirin.
Komîserê Bilind ê Mafên Mirovan ê Neteweyên Yekbûyî Volker Turk careke din bang li rêveberiya Tehranê kir ku cezayên darvekirinê rawestîne û vê yekê bike gava destpêkê ya ji bo rakirina bi temamî ya cezayê darvekirinê.
