Nûner û rêveberên saziyan kesên ku di encama erdheja 6ê Sibata 2023an de jiyana xwe ji dest dan li goristana Yenîkoyê hatin bibîranîn.
Kesên di erdhejên 6ê Sibata 2023yan de jiyana xwe ji dest dan, bi pêşengtiya Platforma Parastina Bajar û Piştevaniyê ya Amedê, Platforma Rêvebirina Karesatê û Piştevaniyê (DMS) û Platforma Ked û Demokrasiyê ya Amedê li Goristana Yenîkoy a Rezan a Amedê hatin bibîranîn. Hevserokê DMSê Şerefxan Aydin, kesên di erdhejê de jiyana xwe ji dest dayin bi bîr anî. Parlamentera DEM Partiyê ya Amedê Adalet Kaya jî tiştên di dema erdhejê de qewimîn bi bîr xist û da zanîn ku gelek kesan ji ber serma, birçîtî û tîbûnê jiyana xwe ji dest dane. Adalet Kaya, diyar kir ku piştî erdhejê tu gav nehatine avêtin û got: “Em ê mafên mexdûrên erdhejê li her derê biparêzin.”
Parlamenterê CHPê Sezgîn Tanrikulu jî anî ziman ku tenê yek peywirdarê cemaweriyê ji ber erdhejê nehatiye darizandin û banga piştevaniyê kir. Piştî axaftinan, beşdaran qurnefîl danîn ser gorên kesên jiyana xwe ji dest dane.
