Nûnerên Rêveberiya Xweser a Bakur û Rojhilatê Sûriyeyê û MSDê bi rayedarên payebilind ên Brîtanyayê re civîyan. Gelek mijarên têkildarî siberoja Sûriyeyê nîqaş kirin.
Şandeyeke Bakur û Rojhilatê Sûriyeyê li Brîtanyayê bi parlamenterê Partiya Federal a Demokratîk Sammy Wilson, nûnera Partiya Muhafazekar Caroline Dinenage, siyasetmedar û dîplomatê berê Lord Jay re hevdîtin kir. Di şandeya Bakur û Rojhilatê Sûriyeyê de hevseroka Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehmed, hevserokê Nivîsgeha Têkiliyan a Meclisa Sûriya Demokratîk (MSD) Hesen Mihemed Elî hebûn. Her du aliyan, kiryarên dijminane yên komên girêdayî Tirkiyeyê, êrişên Ii dijî Bendava Tişrînê ku gefeke mezin a pêkanîna karesateke mirovî dixwe, nîqaş kirin. Aliyan diyar kir ku ji bo rawestandina êrişên li dijî ewlehiya herêmê û jêderên wê, divê zext bê kirin.
Yek ji mijarên serek ên hatin nîqaşkirin ew bû ku divê tevahî hêzên siyasî li Sûriyeyê beşdarî konferansa nîştimanî ya Sûriyeyê bibin. Aliyan xwestin ku jin bi awayekî çalak tev li vê diyalogê bibin. Her du aliyan anî ziman ku divê modela Rêveberiya Xweser ku bingeha îstîqrara herêmê û Sûriyeyê ye were parastin û got, divê ev model beşeke ji siberoja Sûriyeyê be. Mijara vegera koçberan û parastina demografiya Sûriyeyê beşeke ji nîqaşan bû. Şandeya herêmê, ji bo vegera şêniyên Efrînê û tevahî koçberên din, derxistina çeteyan ji herêmê, bang kir ku di vî alî de fişar hebin û bên kirin. Her wiha hat gotin divê şandeyeke navneteweyî bê avakirin ku serdana Bakur û Rojhilatê Sûriyeyê bike û ji nêzî ve rewşa mirovî û ewlehiyê ya herêmê bişopîne.
Parlamenter Wilson got ew amade ye tev li şandeyekê bibe ku serdana Bakur û Rojhilatê Sûriyeyê bike û di heman demê de bal kişand ser girîngiya şopandina geşedanan li herêmê ji bo ku li ser wê esasê Parlamentoya Brîtanyayê piştgiriya pêwîst pêşkêş bike. Wilson diyar kir ku gelê Sûriyeyê rewşê baş nas dike û ew ê piştgiriya hewldanên bidestxistina çareseriyeke siyasî ya giştî li Sûriyeyê bikin. Bandora cezayên navneteweyî li ser Sûriyeyê jî ket rojeva civînê. Şandeya herêmê diyar kir ku di encama berdewama cezayan de, xizanî zêde dibe û dê bi xwe re tevliheviyê jî çêke.
Di dawiyê de her du aliyan got divê civata navneteweyî piştgiriya hewldanên bidestxistina çareseriyeke siyasî li Sûriyeyê bike ku mafên pêkhateyan were parastin û rêzê ji pirrengiya olî û nijadî ya li Sûriyeyê re bê girtin.
