Amed – Rêveberê Komeleya Wêjekarên Kurd Ahmet Tamîr ku yek ji îmzakarê deklarasyona “Ji bo Komara Demokratîk û Aştiyê 1001 îmze” ye, diyar kir ku Rêberê Gelê Kurd Abdullah Ocalan hewl dide pirsgirêkan bi rêya aştiyê çareser bike û got: “Em çiqas ji vê bangawaziyê re bibin deng dê ewqas bigihîje mebesta xwe. Divê statuya Rêberê Gelê Kurd were nasîn.”
Li Stenbolê bi pêşengtiya jinan, rewşenbîr, hunermend, akademîsyen, karker û ciwanan deklarasyona “Ji bo Komara Demokratîk û Aştiyê 1001 îmze” hatibû eşkerekirin. Îmzakarên deklarasyonê bi peyama “Dema çîrokên rastîn dest pê dikin civak dev ji xeyalkirina siberoja xwe bernade” dest bi kampanyaya xwe kirin. Îmzakarên deklarasyonê daxwaza hemwelatiya wekhev, bicihanîna biryarên Dadgeha Mafên Mirovan a Ewropayê (DMME) û nasîna “mafê hêviyê” kirin û gotin: “Em ji bo piştgiriya aştiyê helwest datînin.” Yek jî wan îmzakaran Rêveberê Komeleya Wêjekarên Kurd Ahmet Tamîr e. Ahmet Tamîr derbarê deklarasyona ku îmze kiriye de ji ajansa me re axivî.
‘Em dixwazin di nav civakê de fikr û ramana azadiyê belav bibe’
Ahmet Tamîr anî ziman ku armanca îmzeyan di civakê de peydakirina aştiyeke mayînde ye û wiha got: “Armanca me di civakê de fikr û ramana demokratîk û azadî bê belavkirin e û civak hemû li ser nasnameya xwe, baweriya xwe bijî û xwe birêxistin bike ye. Bêguman ev jî bi xwe re ava kirina bingehekê tîne. Weke nivîskar, me jî got ev jî ji bo me nivîskaran teqez ferz e. Divê em destnîşana xwe biavêjin. Ji ber ku nivîskar pêşengên civakê ne, siyasetmedarên civakê ne, felsefevanên civakê ne.”
‘Rêberê Gelê Kurd hewl dide ku pirsgirêkê çareser bike’
Ahmet Tamîr diyar kir ku li ku derê bêedaletî, bêmafî û zilm hebe peywîra nivîskaran jî lêgerîna çareseriyê ye û wiha got: “Birêz Ocalan ev pêvajo da destpêkirin, em hêvîdar in û baweriya me jî heye ku dê serbikeve. Ew jî di destê me de ye. Em çiqas ji vê bangawaziyê re bibin deng û hemû sazî bibin deng, dê ewqas bigihe mebesta xwe. Lê mixabin îro ku em li siyasetê binêrin, di civakê de bêbaweriyê dide afirandin. Li Tirkiyeyê siyaset li gorî berjewendiyan tevdigere. Lê bila ew jî baş bizanibin ku Rêberê Gelê Kurd Birêz Ocalan hewl dide ku vê pirsgirêkê bi rêya demokrasiyê û aşitiyê çareser bike.”
‘Weke nivîskar em jî dibêjin, deriyê Îmraliyê bila vebin’
Ahmet Tamîr di berdewama axaftina xwe de bi lêv kir ku ji ber Tevgera Azadiyê ya Kurd gavên girîng avêtin hinceteke dewletê nemaye ku gavan neavêje û ev yek anî ziman: “Weke nivîskar em jî dibêjin, deriyê Îmraliyê bidin vekirin. Statuya Rêberê Gelê Kurd divê bê nasîn. Bila rêzdar Ocalan fikr û ramanên xwe bi hemû kesan re parve bike. Bila pergaleke komînal bê avakirin ku ew bingeha em bêjin komara demokratîk bihêz bibe.”
‘Her tim hêviya xwe bilind bikin’
Ahmet Tamîr destnîşan kir ku ji ber dek û dolabên dewletê naqedin ew ji dewletê bawer nakin û axaftina xwe wiha bi dawî kir: “Lê ew nayê wê wateyê ku gav jî neyên avêtin. Yan jî nayê wê wateyê ku ji bo hin berjewendiyên dewletê reformekê jî çênekin. Weke mînak, di civakê de hinek kes dibêjin ‘baweriya me dewletê nayê, lîstoka dilîzin’ rast e dewlet wiha ye, lê hêviya me jî, bi hêza me heye. Ew binyatê nasnameya civakê di hêla rêxistinbûniya xwe de çiqas bi rêk û pêk bikin, ev daxwaz û bangawaziya aştiyê jî dê pêk were. Bila tu kes bêhêvî nebe, her tim hêviya xwe bilind bikin.”
