Pîrozbahiya Newroza Frankfurt ê Elmanyayê Newroza îsal a bi “Yekîtî û piştevaniya neteweyî’” tê lidarxistin. Pîrozbahî bi beşdariya deh hezaran li Rebstockparkê dest pê kir.
Kurdistaniyên ku ji bajarên cuda ên Elmanyayê civiyan, bi cil û bergên xwe yên gelêrî, sembolên têkoşîna azadiya Kurdistanê û alên YPJ û YPGê ketin qada pîrozbahiyê. Girseya gel a berê xwe da qada pîrozbahiyê, gelek caran dirûşmên “Bijî Serok Apo”, “Gerîlla”, “Jin Jiyan Azadî” û “Yekîtiya Gelê Kurd” berz kirin.
Girseya ku li qadê kom bû, li gel gerandina govendan, berzkirina dirûşmeyan û stranan coşa Newrozê û li gel konên ku li qada pîrozbahiyê û derdora wê hatine danîn Newroz weke mîhrîcanekê tê pîroz kirin. Bername bi berzkirina dirûşmeya ‘’Bijî Serok Apo’’ û xwedina sirûda ‘’Ey Reqîb’’ dest pê kir. Bi dorê Koma Zarokan piştre jî Hevserokê KON-MEDê Kerem Gok û li ser nav TJK-Eyê Ayten Kaplan li ser navê komîteya amadekar axivîn.
Ayten Kaplan di axaftina xwe de diyar kir ku gelê Kurd Kurd bi bedelên mezin Newroz gihandiye roja îroyîn û got: “Ez Newrozê li gel bîranîna Mazlûm, Zekiye, Ronahî û gelek lehêngên din pîroz dikim.”
Newroza Mazlûm, Zekiye û Ronahiyan
Piştre Kerem Gok axivî, Newroz pîroz kir û diyar kir ku berxwedana gelê Kurd a di pêşengtiya Rêber Apo de hate nîşandan mohra xwe li Newroza îsal xistiye. Kerem Gok bang li hikûmeta Elmanyayê kir û ev yek anîn ziman: “Rêbertî di 27ê Sibatê de pêngaveke dîrokî avêt. Hikûmeta Elmanyayê jî peyameke ku piştgirî dida vê pêngavê parve kiribû. Divê hikûmeta Elmanyayê ji bo çareseriya pirsgirêka Kurd zextê li Tirkiyeyê bike û helwesta çareseriyê nîşan bide.”
Newroz bi stranên hunermend Jala didome
Pîrozbahıya Newrozê li gel performansa hunermend JALA berdewam dike. Beşdarvan, li gel stranên tên gotin û govendên tên gerandin coşa Newrozê mezintir dikin û didomînin.
