Endamê Komîteya Amadekar a Newroza Stenbolê Hasan Teymur diyar kir ku ew mal bi mal digerin û gel vedixwînin Newrozê û got: “Em li bendê ne ku milyonek kes tev li Newroza Stenbolê bibe. Em ê li qada Newrozê azadiya fizîkî ya Serokatiyê bixwazin.”
Newroza 2026an bi dirûşmeya “Newroza Azadî û Yekîtiya Demokratîk” tê pîrozkirin. Li Stenbolê di 22yê Adarê de li Qada Yenîkapiyê bi tevlibûna Hevseroka DEM Partiyê Tulay Hatimogullari, Hevberdevka HDKê Meral Daniş Beştaş, siyasetmederên Kurd Veysî Aktaş û Çetin Arkaş pîrozbahiya Newrozê tê lidarxistin. Koma Amed û stranbêj Suavî jî dê derkevin ser dikê û stranên xwe bêjin. Li Stenbolê amadekariya Newrozê bi coş didomin. Endamê Komîteya Amadekar ya Newroza Stenbolê Hasan Teymur têkildarî amadakariyên Newrozê axivî û balkişand ser girîngiya Newroza îsal.
‘Dê milyonek kes biherikê qada Newrozê’
Hasan Teymur diyar kir ku li Stenbolê amadekariya Newrozê mal bi mal didome û wiha axivî: “Me ji bo Newrozê komîsyon avakirine. Di Newroza 2026an de daxwaza azadiya fizîkî ya Serokatî dê were kirin. Xebatên me jî bi vê armancê didomin. Em her şev çend bajarên Stenbolê Newrozê pîroz tê pîrozkirin. Em di nav gel de wê kelecaniyê dibînin. Gelê me ji bo Newrozê amade ye. Em bawerin ku milyonek kes dê biherikê qada Newrozê. Me li her navçeyên Stenbolê komîsyon avakirine. Hevalên me jî mal bi mal digerin.”
‘Newroza îsal dê bibe daxwaza azadiya fizîkî ya Serokatî’
Hasan Teymur anî ziman ku bangawaziya Rêberê Gelê Kurd Abdullah Ocalan a 27ê Sibata 2025an wateya Newroza îsal jî girîng dike û ev tişt anî ziman: “Ji bo xwedî derketina bangawaziya Serokatî dê gel were qadê. Newroz heta îro berxwedan bû lê Newroza îsal dê bibe daxwaza azadiya fizîkî ya Serokatî. Gel jî dê bi vî awayî tevli Newrozê bibe. Di qadên Newrozê de jî azadiya fizîkî ya Serokatî dê olan bide û daxwaza yekîtiya gelê Kurd bilind bibe. Peyamên herî girîng ev in. Em dê qadê bi rengên kesk, sor û zêrê bixemilînin. Em bang dikin ku gelê me bi cil û bergên xwe yên neteweyî tevli Newrozê bibe.”
‘Newrozê dê bibe govenda azadiya gelê Kurd’
Hasan Teymur destnîşan kir ku ew li benda nêzî milyonekê kes in û wiha domand: “Em di nava gel de dibînin ku xwedî derketinek mezin hem li Newrozê hem jî li banga Serokatî heye. Rastî jî Newroz ji bo gelê Kurd gelek girîng e. Em bawerin ku gel dê Newrozê bike dîlan û govenda azadiya gelê Kurd.”
Banga tevlêbûnê
Di dawiyê de Hasan Teymur bang li gel kir û axaftina xwe wiha bi dawî kir: “Jin, ciwan û kesên azadîxwaz hemû kes werin qada Newrozê û govenda Newrozê bigirin. Ji bo pêşeroja gelan divê herkes tevli Newrozê bibe. Ev Newroz bibe serdema azadibûna gelê Kurd.”
