Neteweyên Yekbûyî (NY) di raporekê de aşkere kir ku di 2025an de rojê 137 jin hatine kuştin.
Nivîsgeha li dijî Hişbir û Sûcan û Desteya Jinan ên Neteweyên Yekbûyî (NY), bi boneya Roja Têkoşîna li dijî Tundiya li ser Jinan a Navneteweyî, rapora sûcên kuştina jinan a 2025an weşand.
NYê di raporê de destnîşankirin ku li seranserê cîhanê rojane 137 jin hatine kuştin û ji sedî 60ê jinên kuştî, bi destê partner an jî ferdên malbata xwe hatine kuştin.
Gerînendetiya Beşa Siyasî ya Desteya Jinan a NYyê Sarah Hendricks têkildarî mijarê da zanîn ku sûcên qetilkirina jinan bi tenê serê xwe çênabin. Sarah Hendricksê diyar kir ku kampanyaya “16 Rojên Çalakiya li dijî Tundiya li ser Bingeha Zayendî” ya îsal aşkera dike ku tundiya dîjîtal pir caran ne tenê bi înternetê ve sînordar e, lê dibe xerabtir bibe, heta bigihêje kuştinê.
Sarah Hendricksê anî ziman ku di tevahî warên jiyanê de mafên jinan ên ewlebûnê hebin û ji pergalan tê xwestin destwerdana zû bikin û got: “Ji bo pêşîlgirtina sûcan pêdivî bi bicihanîna yasayên ku çawa rê li ber tundiya li dijî jinan bê girtin, heye.”
Gerînendeyê Nivîsgeha li dijî Hişbir û Sûcan a NYyê got rapor bi bîr dixe ku divê stratejiyên pêşîlêgirtinê û bersivdanên edaleta cezayî yên li hember qetilkirina jinan bên pêkanîn.
Li gorî raporê di 2024an de nêzî 50 hezar jin û zarokên keç ji aliyê kesên nêzî xwe ve hatin kuştin.
