Navenda Belgekirina Binpêkirinan (NBB) ragihand ku ji destpêka Îlonê heta niha li herêma kontrola hikumeta demkî û herêmên ku dewleta Tirk ew dagirkirine, herî kêm 14 kurd hatine revandin.
Navenda Belgekirina Binpêkirinan a Bakur û Rojhilatê Sûriyeyê der barê revandina welatiyan li herêmên Sûriyeyê de raporek weşand. Di raporê de hate diyarkirin ku li herêmên bi bin kontrola hikumeta demkî ya Sûriyeyê de û li herêmên ji aliyê dewleta Tirk ve hatine dagirkirin, revandin û girtina belasebeb a şêniyan zêde bûne. Li gorî raporê, ji destpêka Îlona îsal (2025) ve, li Efrîna dagirkirî, Heleb û Şamê bi kêmanî 14 kurd hatine revandin. Hate diyarkirin ku piraniya bûyerên revandinê di dema serdegirtina malan û talankirina wan de, her wiha li ser bendên kontrolê û rêyan pêk hatine.
Di heman raporê de hatiye destnîşankirin ku ji destpêka îsal heya dawiya Tebaxê, 190 Kurd hatine revandin. Hate diyarkirin ku ji revandiyan 2 zarok û 6 jî jin in. Di raporê de hatiye aşkerakirin ku ji bilî revandiyan jî 56 girtî nexweş in û pêdiviya 31 girtiyên nexweş bi lênerîna lezgîn a bijîşkî heye.
Navendê di raporê de da zanîn ku dibe hin malbat ji tirsan û ji ber sedemên ewlehiyê navên zarokên we yên girtî nedane û dibe hejmara revandiyan ji vê zêdetir be jî.
Di raporê de hate diyarkirin ku herî zêde li Efrînê ya ku ji sala 2018’an ve di bin dagirkeriya dewleta Tirk û çeteyên wê de ye, sûc û binpêkirin têne kirin.
Navendê destanîşan kir ku ku hemû bûyerên revandinê bêyî biryara fermî pêk hatine û bi bîr xist ku ev nêzîkatî li dijî pîvanên navneteweyî yên mafên mirovan e.
Li gorî raporê kesên hatine revandin yekser agahî ji wan qut dibe.
Navendê di dawiya raporê de bang li hêzên navneteweyî û rêxistinên hiqûqî kir ku zextê bikin da ku ev kiryar werin rawestandin, hesab ji berpirsan were pirsîn, aqûbeta revandiyan were aşkerakirin û parastina wan a fîzîkî û derûnî bê kirin.
