Amed – Komeleya Berî Her Tiştî Zarok dê di 26-27-28ê Îlonê de li Amedê Mihrîcana Zarokan a Navçandî li dar bixe. Xebatkara komeleyê Şirîn Saglamê ev bang li gelê Amedê kir: “Ji bo xwedî li çand, ziman û nasnameya xwe derkevin em dixwazin beşdarî mihrîcanê bibin.”
Komeleya Berî Her Tiştî Zarok, di çarçoveya projeya “Xurtkirina Kapasîteya Parastina Mafên Jin û Zarokan ya bi Rêya Hunerê” de ku bi hevkariya Ajansa Tevkarîya Pêşketina Katalanan dimeşîne, Mihrîcana Navçandî ya Zarokan li dar dixe.
Di Mihrîcana Zarokan a Navçandî de berhemên kargehên çand, huner û afirînerîyê yên ku nêzî şeş mehin dewam dikin, dê werin nîşandan. Mihrîcan dê di 26-27-28ê Îlonê li Amedê were li dar xistin. Di mihrîcanê da bi tenê dê berhemên zarokan xuya nebin; dê herweha bi tevkarîya dezgehên civaka sîvîl û hunermendên navneteweyî mazûvaniya pêwendiyên navçandî jî were kirin.
Di Mihrîcanê da li gel kargehên wêne, karîkatur, şano, muzîk û veguherînê/rîsaykilê û hin performansên li ser dikê, muzîkjenên katalan yên partnerên projeyê dê konserên solo bidin û bi zarokan ra kargehan li dar bixin. Wekî din jî, ev mihrîcana ku bi tevkarîya Şaredarîya Bajarê Mezin a Amedê pêk tê, dike armanc ku çanda xebata bi hev re ya rêveberîyên herêmî û dezgehên civaka sîvîl ya ji bo zarokan xurt bike.
Di mihrîcanê da zarok dê ne bi tenê bibin temaşevan, ew dê her wiha hilberînin û wê derfetê bibînin ku çîrokên xwe bi rêya hunerê rave bikin. Xebatkara Komeleya Berî Her Tiştî Zarok Şirîn Saglamê têkildarî mihrîcanê ji ajansa me re axivî.
Kargeh li dar xistin
Şirîn Saglamê da zanîn ku nêzî şeş mehan e amadekariya vê mihrîcanê dikin û wiha got: “Kargehên me hebûn bi hevkarên me yên weke Zarok Tv, Ma Musîc û Şanoya Bajêr a Amedê re. Di Zarok Tvyê de kargehên me yên afirîneriyê hebûn. Weke kargeha teknolojiyê, wêne, karîkatur û fotografî çêbûn. Bi Ma Muzîkê re jî kargehên me yên stranbêjiyê, sêtêlê û rîtma xwezayî çêbûn. Bi saya Şanoya Bajêr a Amedê jî me bi ciwanan re du kargeh li dar xistin. Kargeha lîstika muzîkan û şanoyê li dar xistin.”
‘Armanc ew e ku em şert û mercên zarokan baştir bikin’
Şirîn Saglamê armanca mihrîcanê wiha vegot: “Armanca mihrîcana me ew e ku em xwe bigihînin zarokên ji şer reviyan e, penaber û bi taybetî jî yên li navçeya Sûr a Amedê û hinekê jî be em şert û mercên wan ên jiyanê baştir bikin. Niha kargehên me qediyan amadekariyên mihrîcanê didomin.”
‘Projeyên me yên ji bo zarokan dê berdewam bikin’
Şirîn Saglamê bi lêv kir ku weke Komeleya Berî Her Tiştî Zarok projeyên wan ên ji bo zarokan didomin û ev tişt gotin: “Bi taybetî projeyên me yên ji bo ziman hene. Piştî mihrîcanê jî em ê bi zarokên ciwan re bi zaravayê kurmancî yê Kurdî dublaj û anîmasyonê çêbikin. Piştî van perwerdehiyan dê zarok li Zarok Tvyê ku hevkarên me ne perwerdehiya xwe bidomînin.”
‘Ji bo xwedî li derketina çand û nasnameya xwe tev li bibin’
Şirîn Saglamê qala naveroka mihrîcanê kir û herî dawî ev bang li gelê Amedê kir: “Bi taybetî jin û zarokan em bang li gelê Amedê dikin ku werin tev li mihrîcanê bibin. Ji bo xwedî li çanda xwe zimanê xwe û nasnameya xwe derkevin em dixwazin beşdarî mihrîcanê bibin. Mihrîcan ji bo zindîkirina van tiştan jî girîng e. Kerem bikin em ê bi beşdarbûna we gelek keyfxweş bibin.”
Bernameya Mihrîcanê bi vî awayî ye:
“26ê Îlonê – Çand Amed (Navenda Çand û Kongreyê ya Şaredariya Bajarê Mezin a Amedê)
*17.30 – Axaftinên Destpêkê yên Protokolê
*Sînevîzyon – Stop motion
*Komeleya Hêvîyên Rengîn – Koroya Zarokan ya Rengîn
*Ma Music– Koma Stranbêjî/Rîtm/Ksîlofon-Boomwhackers, Koma Sêtêljenan
*Muzîkjenên Katalan -Performansa Muzîkê Ya Solo
27ê Îlonê
Saet: 12:00- 17:00 li Sumerparkê
*Ma Music – Gerok Ma
*Rengareng- Kargeha Çêkirina Zendikan
*Zarok TV – Pêşangeha resim û karîkaturan & Kargeha Karîkaturan
*Yasemîn (Komeleya Berî Her Tiştî Zarok)- Kargeha Kûklayan
*Mordem Huner – Kargeha Kûklayan
*Kased Kargeha Rîsaykilê/Veguherînê û Kolajê
*Mordem Huner -Jonglor
*Weqfa Koçê – Çêkirina Gerdenîyên Darîn
*ÇIAD (Komeleya Dadwerîya ji bo Zarokan) – Kargeha Gihîştina Mafan
*Muzîkjenên Katalan – Kargeha Muzîkê
Cih: Çand Amed
Saet: 18.00
Şanoya Bajarê Amedê – Bijîşkê min yê Xoşewîst
28ê Îlonê
Cih: Çand Amed
Saet: 13.00
-Şanoya Bajarê Amedê – Keçelok
Saet: 18.00
-Şubadap – Şanoya Çîrokan ya Moyo
-Şubadap – Şowa Pandomîmê ya Îlker Kiliçer
-Şubadap – Konser”
