Di roja 2yemîn a Mîhrîcana Girê Koxê de hunermend Bîlge Rozeyy, Eylul Nazlier û Sîpan Xelat bi awazên xwe meydana Koxê hejandin.
Mîhrîcana Girê Koxê ya 12emîn a ji aliyê Şaredariya Gimgimê ve bi dirûşma ‘’Bi hêza hunerê dê aştî bê welatê rojê ‘’ tê li darxistin bi axaftina Hevserokê DBPê yê Mûşê Umut Yılmaz û bi konserên hunermend Bîlge Rozeyy, Eylul Nazlier û Sîpan Xelat li meydana Koxê bi tevlîbûna bi hezar welatiyan berdewam kir.
Gimgim gihişte hesreta xwe
Di destpêka konseran de Hevserokê DBPê yê Mûşê Umut Yilmaz qala mîhrîcanê kir ku ev 12 sal in bû hesret di nava gelê Gimgimê de û axaftina xwe wiha lê zêde kir: “Em li ser vê axa kevnar ji bo govend, stran, şahî, dîrok û siberoja hatine cem hev. Li welatê me şahî xwedî derketina dîrok, ziman û çandê ye. Gimgim cîhekî dîrok e û bi êş û berxwedanê hatiye nivîsandin. Çiyayên Gimgimê gelek êş û derd dîtine, gundên Gimgimê gelek çîrok di nava xwe veşaerti ne.”
Li Gimgimê avakirina civaka demokratîk
Umut Yilmaz di berdewama axaftina xwe de behsa pêvajoyê kir û girîngiya pêvajoyê wiha anî ziman: “Em di konaxeke nû de ne, di 27ê Sibatê de rêzdar Abdullah Ocalan banga guhertin û serdemeke nû kir. Aştî bi civakeke xurt, rêxistinkirî û xwedî vîn tê. Civaka demokratîk em ê li Koxê, li Gimgimê ava bikin.”
Piştî axaftinê mîhrîcanê bi konserên hunermend Bîlge Rozeyy, Eylul Nazlier û Sîpan Xelat bi coşdarî berdewam kir û bi vî awayî bi dawî bû.
Bernameya sibê
Mîhrîcana Koxê dê sibê bi panelên “Di dîrokê de Gimgim” , “Cîhêkariya Zayenda Civakî û Kuştina Jinan”, Dîwana dengbêjan û bi konserên Mizgîn Turan, Denîz Esmer û Serhedo bi dawî bibe.
