Di peyama Mesûd Barzanî ya ji bo Konferansa Yekrêzî û Yekhelwesta Kurdî li Rojavayê Kurdistanê de hate gotin ew piştgiriyê didin çareseriyên aştiyane û dîplomatîk û hate diyarkirin ku divê mafên Kurdan di destûra nû ya Sûriyeyê de werin mîsogerkirin.
Konferansa Yekrêzî û Yekhelwesta Kurdî li Rojavayê Kurdistanê li Parka Azadî ya bajarê Qamişloyê dewam dike.
Di konferansê de nûnerê Serokê Partiya Demokrat a Kurdistanê (PDK) Mesûd Barzanî, Hemîd Derbendî peyama Mesûd Barzanî xwend.
Di peyamê de lidarxistina konferansê hat pîrozkirin û wek gaveke girîng ber bi yekitiya Kurdan a li Sûriyeyê ve hate nirxandin.
Mesûd Barzanî di peyama xwe de spasiya Mezlûm Ebdî kir ku roleke sereke di yekkirina helwesta Kurdan de lîstiye û hêvî kir ku konferans hêviyên gelê Kurd bi cih bîne.
Di peyamê de hate gotin, bûyerên ku li herêmê rû didin bû wesîle ku gelê Kurd ji bo mafên xwe têkoşînê bike û wiha hat domandin: “Em piştgiriyê didin çareseriyên aştiyane û dîplomasî. Em hêvî dikin ku gelê Kurd ji bo mafê xwe têkoşînê bike û di destûrê de mafên Kurdan werin mîsogerkirin û gelê Kurd tevahî mafên xwe yên rewa bi dest bixe.”
Di peyama Mesûd Barzanî de hate gotin, “ev konferans dê rê li ber hêzên kurdî û kurdistanî veke ku bibin yek û nêrîna gelê Sûriyeyê di Sûriyeya nû de bike yek, ev jî dê bandoreke erênî li welatên cîran bike.”
Konferans bi axaftina beşdaran dewam dike.
