Mehmet Çevîren ê ku li Girtîgeha bi Ewlekariya Bilind a Qubîn a Êlihê dihat ragirtin û duh bi awayekî guman jiyana xwe ji dest da, li navçeya Dêrikê bi tevlêbûna girseyeke mezin hat definkirin.
Mehmet Çevîren ku 11 sal bûn di girtîgehê de dihat ragirtin, cenazeyê wî ji Nexweşxaneya Dewletê ya Dêrikê hat wergirtin û birin Goristana Taxa Kaleyê ya navçeyê. Di merasîma definkirinê de gelek kes amade bûn û girseyê diruşmeyên “Bijî berxwedana zindanan” û “Şehîd namirin” berz kirin.
‘Di mehekê de çar cenaze derketin’
Piştî veşartina cenaze Hevserokê TUHAD-DERê yê Mêrdînê Fettah Tekîn axivî. Tekîn bertek nîşanî mirinên li zindanan da û got ku di demekê de ku ew li bendê bûn girtî bên berdan, mixabin tenê di nava mehekê de cenazeyên çar girtiyan ji girtîgehan derketine. Piştre Hevserokê MEBYA-DERê yê Mêrdînê Salih Kuday jî destnîşan kir ku zextên hikumetê yên li ser girtîgehan didomin, bi sedan girtiyên nexweş rû bi rûyî mirinê ne û xwest hemû girtiyên nexweş tavilê bên berdan.
‘Girtîgehên tîpên S û Y cihên mirinê ne’
Parlamentera DEM Partiyê ya Mêrdînê Bêrîtan Guneş jî di merasîmê de axivî û bal kişand ser binpêkirinên li girtîgehên tîpa S û Yyê. Guneş anî ziman ku wan gelek caran diyar kiriye ku ev girtîgeh cihên mirinê ne lê tevî hemû hişyariyan jî tevdîr nehatine girtin. Guneş wiha dewam kir: “Heval Mehmet di hevdîtinan de qala îşkenceyên li girtîgehê kiribû. Em dibêjin ku ev mirin teqez bi destê dewletê pêk hatiye. Kesên ku bûne sedema vê mirinê wê teqez hesab bidin û em ê pêvajoyê bişopînin.”
‘Angaşta întîharê rast nîne’
Di dawiya merasîmê de kekê Çevîren, Welat Çevîren jî axivî û îdiayên derbarê întiharê de red kirin. Çevîren diyar kir ku birayê wî teqez întihar nekiriye, malbat bi tu awayî vê îdiayê qebûl nake û ew ê doza birayê xwe heta dawiyê bişopînin.
