Amed – Meclisa Ciwanan a DEM Partiyê ji bo meşa ku dê ji Amedê ber bi Amarayê ve li dar bixin dîmenek parve kir û ev bang kir: “Werin em hemû di 1ê Nîsanê de ji Amedê heta Amarayê bimeşin û bibin pêşengên jiyaneke bi rûmet.”
Endamên Meclisa Ciwanan a Partiya Wekhevî û Demokrasiyê ya Gelan (DEM Partî) dê di navbera 1 û 4ê Nîsanê de ji Amedê ber bi gundê Amarayê yê Xelfetî ya Rihayê ve meşê li dar bixin. Meş dê bi dirûşma “Em bi civaka demokratîk re ber bi azadiyê ve dimeşin” bê lidarxistin. Ciwanan li ser hesaba xwe ya Xyê bi serenavê “Bi Civaka Demokratîk re Ber Bi Azadiyê ve Dimeşin” dîmenek parve kirin.
Di dîmenê hate parvekirin de wiha gotin: “Banga Aştî û Civaka Demokratîk a Rêberê Gelê Kurd Abdullah Ocalan ku di 27 Sibatê de hate weşandin rejîma tecrîda tarî ya ku 43 mehan dihat domandin hilweşand. Bangê hêvî da hemû gel û civakên bindest bi taybetî gelên Kurdistan û Tirkiyeyê û îlana serdemeke nû ya berxwedanê kir. Banga Aştî û Civaka Demokratîk ji bo hemû beşên civakê serdemeke nû ya berxwedanê penase dike û bang li herkesê dike ku bibin avakarên jiyaneke ku li ser esasê azadiya welatê xwe bixebitin. Li ser riya jiyaneke nû ya birûmet em weke ciwan bi hêza pêşeng û berxwederên civakê em ê bi xeta xwe ya bîrdozî û çalakiyê ya herî xurt beşdarî vê bangê bibin. Em bang li hemû gelê xwe yê welatparêz û rêhevalên ciwan dikin ku bangawaziya aştî û civaka demokratîk hembêz bikin û bi dirûşma ‘Bi Civaka Demokratîk re Ber Bi Azadiyê Ve Dimeşin’ bimeşin. Werin em hemû di 1ê Nîsanê de ji Amedê heta Amarayê bimeşin û bibin pêşengên jiyaneke birûmet.
Em wekî Meclisa Ciwanan a DEM Partiyê di 1ê Nîsanê de ji Amedê ber bi Amarayê ve dimeşin. Em bang li hemû gelê xwe dikin ku tev li meşa me ya ji Amedê dest pê dike ji Sêwereg, Hîlwan, Riha û Pirsûsê re derbas bibe û bigihije Amarayê bibin.”
