Di 1emîn Kongreya Asayî ya MEBYADER-EGEyê de hat destnîşankirin ku heta Rêberê Gelê Kurd Abdullah Ocalan azad nebe, aşitî ne pêkan e.
Komeleya Piştgirî, Hevgirtin, Yekîtî û Çandê ya bi Malbatên re Xizmên xwe li Dergûşa Medeniyetan de Winda Kirine ya Herêma Egeyê (MEBYADER-EGE), bi dirûşma ‘Bi civaka demokratîk siberojên azad ava dikin’ li Salona Dawetê ya Mûmcû ya li Konakê 1emîn Kongreya xwe ya asayî pêk anî.
Di kongreyê de pankarta ‘Bi şîara li pey rastiyê li ser sofreya rojê em dicivin civaka û demokratîk ava dikin’ hate vekirin û dirûşma ‘Şehîd namirin’ hat berzkirin. Parlamenterê Partiya Wekhevî û Demokrasiyê ya Gelan (DEM Partî) ê Şirnexê Mehmet Zekî Îrmez, Dayikên Aştiyê, aktîvîstên Tevgera Jinên Azad (TJA), nûnerên rêxistinên civaka sivîl û gelek kes beşdarî kongreyê bûn. Kongre bi rêzgirtina ji bo bîranîna kesên di têkoşîna azadiyê de jiyana xwe ji dest dan û bi nîşandana sînevîzyonê dest pê kir.
‘Deriyên Îmraliyê neyên vekirin aşitî ne pêkan e’
Piştî nîşandana sînevîzyonê Dayika Aştiyê Peyruze Kurt axivî û wiha got: “Em dizanin ku êş û kedera dayikan pir zêde ye lê azadî jî bêbedel ne pêkan e. Ev bedel jî xwîna zarokên me ye. Em bi zarokên xwe serbilind in. Heta dawiya emrê xwe em ê bibin rêhevalên têkoşîna zarokên xwe. Bila herkes bizane ku heta deriyên Îmraliyê heta dawiyê neyên vekirin, aşitî nabe.”
‘Em ê ji lêgerîna xwe ya azadiyê paşve gavê neavêjin’
Hevserokê berê yê MEBYADER-EGEyê Mîkaîl Atan jî ev tişt anî ziman: “Em dibînin ku vî şerê salên dirêj tu tişt neda tu kesî. Dewletê jî ev dît û bang li Rêberê Gelê Kurd Abdullah Ocalan kir û pêvajoyek da destpêkirin. Dewletê di nava 47 salan de gelek êş dan kişandin, gundên me şewitandin, me girtin, îşkence kirin. Tevî van hemû tiştan me ji lêgerîna xwe ya azadiyê paşve gav neavêt, em ê neavêjin jî.”
‘Em ê bi hev re siyaseteke demokratîk bimeşînin’
Piştre Parlamenterê DEM Partiyê yê Şirnexê Mehmet Zekî Îrmez axivî û ev nirxandin kir: “Em ê êdî li Kurdistanê bi ziman û çanda xwe bi awayekî azad bijîn. Bi vî rengî dê Tirkiye û Kurdistan bigihêjin aramiyê. Roja îro roja xwarina ji heman sofreyê ye. Tu hêz nikare li pêşiya vê bibe asteng. Em di vê pêvajoyê de baweriya xwe bi gelê xwe tînin. Kesên li çiyê û zindanan dê werin û em ê bi hev re siyaseteke demokratîk bidin meşandin.”
Piştî axaftinan di encama dengdanê de Fehîme Poyraz û Mehmet Nurî Yildiz wekî Rêveberiya MEBYADER-EGEyê hatin hilbijartin.
