Malbatên dîlgirtiyan û şêniyên Kobanê li Qada Jina Azad civiyan û daxwaza berdana zarokên xwe kirin. Malbatan bang li aliyên peywendîdar kir ku li gorî peymana hatî îmzekirin, dîlgirtî demildest werin berdan.
Li bajarê Kobanê, malbatên dîlgirtiyan bi piştgiriya Meclisa Malbatên Şehîdan li dijî nezelaliya rewşa zarokên xwe çalakiyek li dar xistin. Malbatan diyar kir ku tevî peymana di navbera Hêzên Sûriyeya Demokratîk (HSD) û hikumeta demkî ya Sûriyeyê de, hîn jî zarokên wan nehatine berdan.
‘Divê demildest rewşa zarokên me zelal bibe’
Li ser navê malbatên şehîd û dîlgirtiyan, endamê Meclisa Malbatên Şehîdan Esed Ebûd axivî. Ebûd bal kişand ser peymana 29ê çileyê û wiha got: “Em li vir in da ku dengê zarokên xwe bigihînin her derê. Li gorî peymana 29ê çileyê diviyabû dîlgirtî bihatana berdan, lê heta niha em tu agahiyê nagirin. Divê demildest rewşa zarokên me bê diyarkirin.”
‘Em bi rêveberiya xwe bawer in’
Ebûd di berdewamiya axaftina xwe de destnîşan kir ku ew piştgiriya hewldanên Rêveberiya Xweser û HSDê dikin û got: “Em dizanin rêveberiya me ji bo azadiya dîlgirtiyan bê navber tê dikoşe. Em wekî gelê Kobanê yê berxwedêr soza xwedîderketinê didin. Daxwaza me ya sereke azadiya dîlgirtiyan û radestkirina cenazeyên şehîdên me ye.”
Çalakî bi dirûşmên dilsoziya bi dîlgirtiyan û şehîdan re bi dawî bû.
