Şirnex- Welatiyên Şirnexê ku piştî merasîma Koma Aştî û Civaka Demokratîk ya PKKê ya çekîmhakirinê ji ajansa me (AW) re axivîn û gotin ku divê êdî dewlet gavên şênber biavêje.
Demek dirêj bû merasîma îmhakirinaçekan a Koma Aştî û Civaka Demokrastîk di rojevê de bû. Merasîm 11ê Tîrmehê de li Şkefta Casenê ya li Silêmaniyê pêk hat. Ev merasim kêlî bi kêlî ji aliyê gel ve hate şopandin. Di van kêliyên de gelê Kurd kelecan, kêfxweşî û hestiyarê bi hev re jiya. Li Cizîra Botan ku hêlîna berxwedana Tevgera Azadiyê ye, gava dîrokî ya PKKê bi erênî hate dîtin û nirxandin. Welatiyên ku ji ajansa me re axivîn gotin ku divê êdî dewlet jî gavên şênber biavêje.
PKKê peywira xwe bi cih anî
Welatiyê bi navê Mehmet Beşîr Aykût diyar kir ku wan bawer nedikirin ê pêvajoyek wiha xweş pêk bê û ev tişt anîn ziman; “Em pêvajoyê hemûyê dişopînin, me qet bawer nedikir ku dê tiştek wiha baş pêş bikeve. Kesên di vê rêyê de ked dane seheta wan xweş be. PKKê peywira xwe kir divê dewlet jî peywira xwe bi cih bîne û em bi hêvî ne dê bike jî.”
‘PKKê nîyeta xwe aşkere kir divê dewlet jî gav biavêje’
Sebahattîn Elçî diyar kir ku dema wî dîmen ditîne hestiyar bûye û wiha axivî; “Dema min dîmenên Ocalan dîtin ez gelek hestiyar bûm. Ev pêvajo gelekî baş e. Bila êdî tu kes nemire. Gava PKKê gaveke niyeta erênî bû, ji bo îro pêde divê dewlet peywîra xwe bi cih bîne û deriyê zîndanan veke.”
‘Em Kurd 100 sal in li mafê xwe digerin’
Sekvan Akti şerê di navbera PKKê û dewletê bi bîr xist û ev tişt anîn ziman; “Em bi dîtina Rêberê Gelê Kurd Abdullah Ocalan pir keyfxweş bûn. Dewletê jî PKKê jî dît ku pirsgirêka Kurdan bi çeke çareser nabe. Divê êdî roj bûbe ya pênûsê. Vaye 100 sal in em Kurd li mafên xwe digerin û divê dewlet êdî bi qanûnan mafê me bide me.”
Dayîka bi navê Xezal Bertey got ku ew naxwazin tu kes êdî were kuştin û wiha pêde çû; “Em êdî naxwazin ne leşker ne gerîla werin kuştin. Aştî tişteke gelek xweş e. Beriya niha jî gelek xweş bûn. Bila dewlet jî li aştiyê xwedî derkeve û mafê me bide me.”
‘Divê Serokomar aramiyê bixe nava gel’
Emîn Aykût ku Seyda ye da zanîn ku ne mirovahî ne jî Misilmantî kuştinê qebûl dike û wiha got; “Divê Serokomar Erdogan hizûrê bêxe nava gel, divê me qebûl bikin û li gor vê tevbigerin. Ev aştî jî li ser xêrê be divê dewlet wekhev nêzî her kesê be. Divê êdî kes ji kesî ne zêde be. Vaye 50 sal in PKK şer dikeve çeken xwe danîn û şewitandin. Me ev yek bi çavên xwe dît. Ev tiştek gelek xweşik bû bo silhê, divê aliyê din jî tiştna bike, em bibinin û bipejirînin.”
‘Divê her tişt zelal be’
Kemal Beltekîn jî da zanîn ku ew tiştekî ji pêvajoyê fam nakin û wiha axivî: “Silh ango aştî bi eşkere tên kirin. Niha em tiştekî jê nizanin. Divê gav bi zelalî bêne avêtin. Me hemûyan dît ku PKK ji çiyayî hat û çekên xwe şewitandin. Lê dewletê gavek şênber neavêtiye. Ger gavekî neavêje tê wê wateyê ku ne rast e.”
