Platforma Jinan a Wanê ji bo 6 jinên ku di rojekê de hatine kuştin daxûyaniyek da û xwest Qanûna bi hejmar 6284an û Peymana Stenbolê bikeve meriyetê.
Platforma Jinan a Wanê ji bo 6 jinên ku di rojekê de hatine kuştin li Kolana Hunerê ya Wanê daxuayanî da. Hevseroka DEM partiyê ya Wanê Gulşen Kurt, Dayikên Aştiyê, endam û nunerên saziyên sivîl ên civakî tev li daxûyaniyê bûn. Di daxûyaniyê de pankarta “Kuştina jinan polîtîk e” hate vekirin. Hevseroka OHDê Hatîce Bagciyê metna daxuyaniyê xwend.
‘Ddewlet erka parastinê pêk nayne’
Hatîce Bagciyê da zanîn ku di demên dawî de li Tirkiyeyê di rojekê de 6 jin ji aliyê mêran ve hatin kuştin û wiha got: “Di van kuştinan de; Li Arnavutkoya Stenbolê Fîlîz Şagbangul li ber çavên sê zarokên xwe ji aliyê Giyasettîn Şagbangulê ku di pêvajoya cudabûnê de bû, bi alaveke tûj ve hat kuştin. Li Gebzeyê Aylîn Polat Dag ê ku der barê wê de biryara qedexeya derketina derve hebû, li cihekî vekirî bi çekê hat qetilkirin. Li Wanê Gonul Alkan bi şev ji aliyê Kemalettîn Alkan ê ku derheqê wî de biryara dûrxistinê hatibû dayîn ve hat qetilkirin. Li Osmaniyeyê Îlknur Kor ji aliyê Semîh Oner ê ku jê veqetiyabû bi çekê hat kuştin. Li Aksarayê Kubra Kiliç û xizma wê Zeynep Ayaz ji aliyê Tolga Kuş ê ku Kubra Kiliç jê veqetiyabû, bi çekê hatin qetilkirin. Ev kuştin nîşan dide ku tevî biryara astengkirinê ya li kiryaran dewletê erka xwe ya parastinê pêk naîne.”
‘Divê Peymana Stenbolê ji nû ve bê îmzekirin’
Hatîce Bagci Qanûna bi hejmara 6284an bi bîr xist û wiha axivî: “Qanûna bi hejmara 6284an a ‘Parastina Malbatê û Pêşîlêgirtina Tundiya li Dijî Jinê’ ku di têkoşîna li dijî tundiya li ser jinê de yek ji bingehên qanûnî ye, ji bo parastina jinan mekanîzmayek bû. Divê Peymana Stenbolê ji nû ve bê îmzekirin. Qanûna bi hejmara 6284 bi temamî û bi rêk û pêk bê bicihanîn, biryarên astengkirinê bi awayekî bi bandor bên şopandin, li hember memûrên cemaweriyê yên ku di pêkanîna qanûnê de xemsarî dikin, tedbîrên dadwerî û îdarî bên girtin, ji ti rêziknameyên ku sûcdaran diparêzin re, destûr neyê dayîn, polîtîkayên ku newekheviya zayendî xurt dikin divê bên astengkirin.”
Daxûyani bi berzkirina dirûşmên “Jin jiyan azadî” û “Bijî berxwedana jinan” bi dawî bû.
