Zarokên Şengalê ku di Cejna Jîngehparêzî û Zarokan a 4ê Nîsanê de hatin gel hev, xwestin ku sala bê bi Rêberê Gelê Kurd Abdullah Ocalan re şitil biçînin û vê rojê bi hev re pîroz bikin.
Li Şengalê ku 4ê Nîsanê her sal wekî rojeke jîngehparêziyê û cejna zarokan tê pêşwazîkirin, îsal jî li Şengalê bû sedema kêfxweşiyeke mezin. Bi pêşengtiya Saziya Ziman û Perwerdeyê ya Êzidiyên Şengalê, ji bo zarokan mîhrîcaneke rengîn hate lidarxistin. Zarokan bi cilên xwe yên gerîla, şervanî û cilên gelêrî yên herî xweşik beşdarî pîrozbahiyan bûn.
Azadî ji zarokatiyê dest pê dike
Di pîrozbahiyan de gotina Abdullah Ocalan a wekî “Azadî ji zarokatiyê dest pê dike” bû bingeha çalakiyan. Di serdemeke ku teknolojî zarokan ji xwezayê dûr dixe de, 4ê Nîsanê ji bo zarokên Şengalê veguherî cejneke mezin a civakbûn û jîngehparêziyê. Di mîhrîcanê de ji bo zarokan pêşbirk hatin kirin, govend hatin gerandin û stran hatin gotin.
Hest û xeyalên zarokan
Zarokên Şengalê yên ku kêfxweşiya wan ji rûyê wan dihat xwendin, hestên xwe bi me re parve kirin. Zarokan diyar kirin ku ew herî zêde di vê rojê de xwe azad hîs dikin û xeyala wan a herî mezin ew e ku di 4ê nîsana sala bê de, li çiyayên Şengalê bi Abdullah Ocalan re şitilan biçînin û xaka xwe şîn bikin.
Li Şengalê pîrozbahiyên 4ê Nîsanê bi çandina şitilan û gerandina govendan bi dawî bûn.
