Li bajarê Lîverpoolê yê Brîtanyayê, li dijî êrîşên ku li ser Rojava didomin çalakiyeke girseyî hate lidarxistin. Di çalakiyê de ku ji her çar parçeyên Kurdistanê bi hezaran kes beşdar bûn, êrîşên li ser gelê Kurd û bêdengiya hêzên navneteweyî hatin protestokirin.
Li bajarê Lîverpolê yê Brîtanyayê bi hezaran kes ji bo piştgiriya berxwedana Rojavayê Kurdistanê meşiyan. Ji zarok heta ciwan, pîr û kalan bi sloganên berxwedanê meşiyan û daxuyanî dan çapemeniyê.
Di çalakiyê endamên Meclisa Gel a Kurd a Lîverpoolê Ozgur Dep û Meryem Hesekê û endamê TCŞê ya Liverpoolê Cûdî Rojava hîtabî girseyê kirin. Axaftvanan diyar kirin ku têkoşîna dîrokî ya gelê Kurd a li dijî çeteyên HTŞ û DAIŞê îro tê înkarkirin û destkeftî hedef tên girtin.
HTŞ endamên DAIŞê berdide
Di axaftinan de hate destnîşankirin ku bi hezaran çeteyên DAIŞê yên di girtîgehên Rojava de tên ragirtin ji ber êrîşan ji kontrolê derketine û ji hêla HTŞê ve tên berdan. Hate bibîrxistin ku zihniyeta di sala 2017’an de êrişî Manchester Arenayê pêk anî, îro careke din tê jiyîn û ev yek ne tenê ji bo gelê Kurd, ji bo tevahiya cîhanê jî metirsiyeke cidî ye. Axaftvanan diyar kirin ku demokrasiya gel a li Rojava hatiye avakirin, pêşengiya jinê û sîstema parastinê ya ji bo Êzidî, Suryanî, Ermenî û gelên din dixwazin bi têgihiştineke cîhadî bên tunekirin. Ji Hikûmeta Brîtanyayê hate xwestin ku ji bo rawestandina êrişên li ser gelê Kurd gavan bavêje.
