Zextên rejîma Îranê yên li ser girtiyên siyasî dewam dikin. Tê gotin ku fikarên mezin li ser bicihanîna cezayê darvekirina 8 jinên girtiyên siyasî derketine holê.
Rêxistina Mafên Mirovan a Dîdeban derbarê metirsiya bicihanîna cezayê darvekirina 8 jinên girtiyên siyasî yên li Rojhilatê Kurdistan û Îranê hişyariyek belav kir.
Li gorî daxuyaniyê, metirsiya bicihanîna cezayê darvekirinê li ser 8 jinên girtiyên siyasî yên bi navên Pexşan Ezîzî, Zara Şehbazteberî, Nesîme Îslamzehî, Meryem Hodawend, Erxewan Felahî û Mehnaz Çardolî heye.
Hate destnîşankirin ku Werîşe Muradî û Bîta Hîmetî ku du jinên girtiyên siyasî ne û berê cezayê wan ê darvekirinê ji aliyê Dadgeha Giştî ya Welat ve hatibû betalkirin, dîsa di bin metirsiya derçûna heman cezayê de ne.
Di daxuyaniyê de hate diyarkirin ku ev 8 girtî di girtîgehên Evîn û Girtîgeha Navendî ya Reştê de tên girtin. Ev jin bi tohmetên siyasî û ewlehiyê yên mîna ‘bexî’ (serhildana çekdarî), ‘muharebe’ (şerê li dijî xwedê) û tohmetên girêdayî xwepêşandan û çalakiyên siyasî rûbirûyî cezayê darvekirinê hatine kirin. Her wiha 3 kes ji van girtiyan, di nav kesên ku di xwepêşandanên dawî de hatine girtin de ne.
Li gorî agahiyên rêxistinê, di dema lêpirsîna jinan de, binpêkirinên berçav hatine qeydkirin; wekî bêparbûna ji mafê parêzerê serbixwe, nediyariya pêvajoya dadgehkirinê û sepandina zorê ji bo girtina îtîrafan.
