Li gundê Qerxabazarê yê Kanîreşê, şêniyên gund ên ku ji bo projeya JESê ya tê plankirin û dê bandoreke neyênî li gundên herêmê bike bi MEHê re hatin cem hev, diyar kirin ku ew ê li dijî projeyê têbikoşin.
Tevgera Ekolojiyê ya Mezopotamyayê (MEH), li Komeleya Alîkarî û Piştevaniya Civakî ya gundê Qerxabazarê yê navçeya Kanîreşê ya Çewligê, têkildarî projeya Santrala Enerjiya Jeotermal (JES) ku ji aliyê Şirketa Anonim a IGNIS H2 ya Amerîkayê li herêmê tê plankirin, bi welatiyan re hat cem hev.
‘Ji bilî bilindkirina dengê li dijî talanê tu alternatîfek nîn e’
Hevberdevkê MEHê Erdogan Oduk bal kişand ser xetereya JESê û anî ziman ku divê projeyên hilberîna enerjiyê bêyî razîbûna gel û lêkolînkirina bandorên li ser derdor û avahiya erdê neyên kirin. Erdogan Oduk diyar kir ku li gelek deverên Tirkiye û Kurdistanê talanek heye û wiha got: “Ji bilî bilindkirina dengê li dijî talanê tu alternatîfek nîn e. Mîrasa herî girîng a ku hûn ê ji bo pêşerojê û zarokên xwe bihêlin ev e. Ji Gimgimê heta vê herêmê, her der wekî qada madenê hatiye ragihandin. Hîna dema îtirazê ya rapora ÇEDê heye. Divê li vir deng derkeve. Bi sondajê re metalên giran û maddeyên kanserojen dê derkevin holê. Yan em ê li vir xwedî derkevin, yan jî em ê herin. Pêwîst e li vir têkoşîn û dengê me derkeve holê.”
Li dijî talankirina xwezayê banga têkoşînê
Piştre endamê MEHê Parêzer Rojhat Ozgokçe behsa aliyê hiqûqî yê pêvajoya ÇEDê kir û wiha axivî: “Em hatine ku em mil bi mil têbikoşin. Em ê ji aliyekî ve têkoşîna xwe ya hiqûqî bimeşînin û ji aliyê din ve jî raya giştî ava bikin. Li tevahiya herêmê hewildaneke talanê heye. Li Agirî, Colemêrg, Gimgim û Wanê, li her derê talan heye. JESên ku dixwazin li vir çêbikin dê jiyana we qirêj bikin. Dê bi awayekî cidî erdhejê tetik bike. Gelo mirovên li vir dê çawa bijîn? Ne xema wan e. Tenê qezenca şîrketan di xema wan de ye. Ew ê xwezaya herêma ku di bin kontrola wan de ye jî talan bikin.”
Welatiyê bi navê Vedat Surmelî jî anî ziman ku herêm bi temamî hatiye firotin û wekî xelkê Qerxabazarê ew li dijî projeyan têdikoşin. Welatiyê bi navê Mehmet Harmanci yê ku berê di santrala enerjiya jeotermal de xebitiye jî bal kişand ser girîngiya têkoşîna hevpar.
