Amed – Li Girtîgeha Bi Ewleya Bilind a Tîpa 2emîn a Amedê ji ber rebazên dijmirovî girtiyê ku nexweşiya wî ya epîlepsiyê heye ev 2 meh in nayê tedawîkirin.
Di 27ê Sibatê de Rêberê Gelê Kurd Abdullah Ocalan ji bo ku pirsgirêka Kurd û hemû pirsgirêkên Tirkiyêyê bi rêya diyalog û muzakerêyê bên çareserkirin, çanda demokrasiyê, civaka exlaqî û polîtîtîk xurt bibe, normên hiqûqa gerdûnî pêş bikevin banga ‘Aşttî û Civaka Demokratîk’ kiribû. Di vê pêvajoyê de dewleta Tirk şûna ku gavên demokratîkbûnê bavêje, qanûnên nedemokratîk biguhere di polîtîkayên otorîter û antî demokratîk de israr dike. Qadeke ku herî zêde ev polîtîka lê tên meşandin yek jî girtîgeh in. Yek girtiyê ku rastî van polîtîkayên dij mirovî tê jî Arjen Karatayê ku li Girtîgeha Bi Ewleya Bilind Tîpa 2emîn a Amedê ye. Birayê Arjen Karatay Mehmet Karatay li ser zext û zordariya li ser birayê wî tê meşandin ji Ajansa Welat re axivî.
‘Dadgehê bêyî lêkolînê 15 sal ceza da’
Birayê Arjen Mehmet Karatay diyar kir ku Arjen di sala 2016an de li Sûrê hatiye girtin, neh salên xwe qedandiye û got: “Arjen ji zaroktiya xwe de nexweşê epîlepsiyê ye. Xebatkarê Şaredariya Sûrê bû. Dema hê nû lî Surê şer destpêkiribû jî hê dixebitî. Arjen li malê ji ber nexweşiyê li ser hişê xwe diçû. Wê rojê rê têne girtin, nahêlin kes bikeve Sûrê û derkeve. Piştre ji aliyê polêsan ve tê girtin. Piştre doz hat vekirin lê dadgehê tu lêkolîn nekir û 15 sal ceza da Arjen. Heke lêkolîn bihata kirin dê diyar bibûya ku Arjen bêsûc e, Arjen mirovekî nexweş e, ne dikare çek bikar bîne, ne dikare karê rêxistinî bike. Tu eleqa wî pê tune, ji ber di zaroktiya xwe de nexweşiya epîlepsî pê re hebû.”
Ruxmê raporê jî cezayê hucreyê
Mehmet Karatay bilêv kir ku îdareya girtîgehê her roj zextên li ser girtiyan zêde dike û wiha axaftina xwe doman: “Saziya Tibê ya Edlî ji bo Arjen rapora ku bi tena serê xwe nikare jiyana xwe bidomîne daye. Lê ruxmê vê jî girtîgehê 10 rojan cezayê hucrê dabû Arjen. Arjen îtirazî vê biryarê dike lê ceza betal nakin, werdigerînin cezayê hevdîtinê. 2 mehan derketina hevdîtinê ji Arjen re qedexe dikin.”
Yargitay 15 sal kêm dît
Mehmet Karatay da zanîn ku hefteyek berê jî Yargitay di derheq dosyaya Arjen de biryar daye û 15 sal ceza qebûl nekiriye, cezayê giran jê re dixwaze û got: “Arjen mirovekî nexweş e, nikare bi tena serê xwe jiyana xwe bidimîne, 9 sal in di girtîgehê de ye, lê hê jî radibin cezayekî girantir jê re dixwazin. Bi rastî jî li welat edalet nemaye. Ji xwe gel jî her roj diqîre dibêje heq hiqûq edalet.”
Polîtîkayên şerê taybet
Mehmet Karatay anî ziman ku berê dermanên Arjen li gel arjen bûn li gor pêşniyara bijîşk dermanên xwe bikar dîanî û wiha pêde çû: “Lê niha ev nêzî 2-3 mahan e dermanên Arjen ji Arjen girtinê, nahêlin li gel wî bimînin. Her serê sibê û êvarê dermanan tînên ber derî, dixwazin di mazgalê de bidin Arjen. Lê derman nadin Arjen bi xwe, dibêjin devê xwe veke em ê derman bavêjin devê te. Arjen jî vê nêzikatiyê wek heqaret, binpêkirina rûmeta mirov, piçûkxistina kesayeta xwe dibîne û ji ber wê bi wî awayî girtina dermanan qebûl nake.”
‘Gere gel û sazî bibin dengê girtiyên nexweş’
Mehmet Karatay diyar kir ku dewlet ferq û cudatiyê nexe nav mirovan û wiha dawî bi axaftina xwe anî: “Fikir û ramanên wan çi dibe bila bibe, ev mirovan emanetî dewletê ne. Dewlet mecbûr li ewlehiya wan, tenduristiya wan xwedî derkeve. Lê mixabin dema mesele dibe Kurd dewlet wiha nêz nabe. Lê ez hêvîdar im di vê pêvajoyê de hemû girtiyên nexweş werin berdan. Gere gel û saziyên civakî jî bibin dengê van nexweşan, her tim rewşa wan bixin rojevê. Ji ber ku ev nexweş her roj dihelin, ne tenê birê min hemû nexweş wisanin.”
