Şirnex– Li Şirnex her roj ji aliyê şîrketên bazirganiyê û madenê ve xweza tê talankirin û wêrankirin. Rayedarên dewlet niha jî bi çêkirina HESan dixwaze xwezaya Elkê talan bike.
Dewlet bi salan e li Şirnex û navçeyên wê xwezayê talan dike. Li navçeya Qileban a Şirnexê gelek Santralên Hîdro Elektrîkê (HES) hatin çêkirin. Her wiha ji bo li ser Çemê Hêzil HES werin çêkirin biryar hat girtin. Li navçeya Elkê jî beriya niha li ser ava gundê Germavê HESek hatibû çêkirin. Niha jî ji bo 4 HESên din li navçeyê bên çêkirin, amadekarî tên kirin. Di 18ê tîrmehê de di biryarnameya Serokkomariyê de hate diyarkirin ku li ser ava gundê Germavê HESek din bê çêkirin. Ev biryar bi daxwaza îstîmlaqkirina lezgîn a axa gundê Germavê di Rojnameya Fermî ya Dewletê de hat îlankirin.
Her çiqas di Rojnameya Fermî ya Dewletê de tenê ji bo derdora gundê Germavê biryara îstîmlaqkirinê hatibe dayîn jî li gor agahiyên hatine bidestxistin, dê li gundên Karçanê, Bêzal û di navbera gundên Gelejêr û Setkarê de jî 3 HESên din bêne çêkirin. Projeyên çêkirina van HESan beriya niha ji keyayên gundên Karçanê, Bêzal, Gelejêr û Setkarê re hatiye ragihandin. Gundiyên ku me bi rêya telefonê xwe gihandin wan, diyar kirin ku ew ji bo parastina xweza û ava xwe naxwazin ev proje li gundên wan bên çêkirin.
