Piştî bertekên gel ên li dijî daristanên herêma Besta cerdevan niha jî bi şev daristanan dibirin û bi awayekî dizî daran ji herêmê dertixin.
Li Herêma Besta ku dikeve navbera bajarên Şirnex û Sêrtê bi salan e di bin kontrola leşkeran de bi destê cerdevanên bajaroka Sêgirkê ya navçeya Qilebanê û gundê Hosyan ê navçeya Berwariyê daristan tên birîn. Li dijî birîna daristanan her çiqas gel û saziyên ekolojiyê bertekê nîşan bidin jî cerdevanên hêza xwe ji Walîtiya Şirnex û Sêrtê digirin talanê berdewam dikin. Di dîmenên hatine ber destê ajansa me de tê dîtin ku cerdevan bi şev talana daristanê dikin.
Bi şev êzingan bar dikin ê dibin aliyê Sêrtê
Li gor agahiyên ji çavkaniyên herêmê hatine wergirtin û dîmenên ku ajansa me bi dest xistine, cerdevanên gundê Hosyan ji aliyê Sêrtê ve dikevin Herêma Besta û daristanan dibirin. Cerdevan vê yekê êdî bi şev dikin, darên hatine birîn li TIRan bar dikin û bi awayek dizîkî, şev saet piştî 24.00an dibin aliyê Sêrtê.
Cerdevanên talanê dikin beriya niha gef li gundiyan xwaribûn
Hêjayî gotinê ye ku cerdevanên bi navê Medenî Bîlen û Mehmet Bîlen ku ji gundê Hosyan in û daristanan dibirin, beriya niha li şêniyên gundê Omyanis yê di nava Herêma Besta de ye geriyabûn û gef li wan xwaribûn.
