Sazî û dezgehên zimanê Kurdî û demokartîk, tevî partiyên siyasî ber bi Tirba Ehmedê Xanî ve meşek li dar xistin û daxwaza “statuya Kurdî, perwerdehiya bi Kurdî” kirin. Di meşê de xwestin tecrîda li ser Rêberê Gelê Kurd Abdullah Ocalan bi dawî bibe û ji bo Kurdî soz dan Mem û Zînê
Saziyên zimanê Kurdî û saziyên demokratîk, tevî Partiya Demokratîk a Gelan (DBP), Partiya Wekhevî û Demokrasiyê (DEM Partî) û Tevgera Jinên Azad (TJA) li navçeya Bazîdê ya Agiriyê bi daxwaza ‘Statuya Kurdî, perwerdehiya bi Kurdî” heta Tirba Ehmedê Xanî meşiyan. Bi sedan kesên ku li navenda navçeyê kom bûn, ewilî di nava bajêr de meşek li dar xist û dû re ber bi Tirba Ehmedê Xanî ve meşiyan. Ji bajarên Wan, Agirî, Qers, Mûş, Erzîrom, Bedlîs, Îdir û Erdexan gelek kes tevlî meşê bûn.
‘Tecrîda li ser Birêz Ocalan û zimanê Kurdî bi dawî bikin’
Girseyê li ber Tirba Ehmedê Xanî daxuyanî da û ji bo Kurdî statu xwest. Hevberdevkê Komîsyona Çand û Ziman ya DEM Partiyê Heval Dilbahar li vir axivî û da zanîn ku bi salan e ku hewlên mezin ji bo jiholêrakirina zimanê Kurdî têne dayîn, lê zimanê Kurdî xwedî dîrokeke kûr e. Heval Dilbihar, destnîşan kir ku zimanê Kurdî li hember van dagirkeran û qirkirinan li ber xwe da û got: “Ne zimanê Kurdî, lê ew têk çûn. Em îro radigihînin ku siyaseta tunekirina zimanê Kurdî têk çûye û zimanê Kurdî li ber xwe dide. Birêz Ocalan bangek ji bo aştî û civakeke demokratîk kir. Birêz Ocalan ji bo aştiya hemû mafan û Kurdan hewldaneke mezin dike. Em heta dawiyê li pişt vê banga wî ne. Birêz Ocalan li ser ziman dibêje, ‘Zimanê dayikê bi qasî nan û avê girîng e’. Parastina ziman tê wateya parastina hemû mirovahiyê. Ger aştî hebe, divê hemû polîtîkayên tecrîdê yên li ser Birêz Ocalan û zimanê Kurdî bi dawî bibin.”
Soz dan Mem û Zîn
Heval Dilbahar ku daxwazên gelê Kurd rêz kir, ev tişt anî ziman: “Kurd ji bo zimanê Kurdî statuyê dixwazin û divê Kurdî bibe zimanê fermî. Divê ji pêşdibistanên zarokan bigire heta zanîngehê bibe zimanê perwerdehiyê. Divê hemû astengiyên li pêşiya Kurdî bên rakirin. Divê navên wargehên Kurdî ku hatine guhertin, careke din bi Kurdî bên nivîsandin. Divê Kurd, ziman, erdnîgarî û çanda wan di destûrê de werin naskirin. Banga me ji bo hemû gel û saziyên Kurd ew e ku xebata têkildarî ziman zêde bikin. Divê gelê Kurd li dora zimanê xwe bibin yek. Ger Kurdî winda bibe, gelê Kurd jî dê winda bibe. Divê hemû mal bibin dibistan. Kurdî ne tenê nirxa gelê Kurd e, lê di heman demê de nirxa hemû mirovahiyê ye. Careke din, em li vir soz didin Mem û Zîn, Siyabend û Xecê; em ê her dem û li her derê ji bo Kurdî têkoşînê mezin bikin. Em ê tu hêzê wekî astengiyek li pêşiya Kurdî nebînin.”
Piştî daxuyaniyê çalakî bi dirûşmeyên “bijî zimanê Kurdî”, “bê ziman jiyan nabe” bi dawî bû.
