Rêveberiya Herêmî ya DEM Partiyê û şaredariyên wê yên li Amedê bi meş û daxuyaniyekê li Amedê kampanyaya “Bi keda kolektîf bajarên paqij” dan destpêkirin. Hevşaredara Bajarê Nû Safiye Akdag di daxuyaniyê de diyar kir ku kampanya wê li hemû bajarên Bakurê Kurdistanê heta 21ê Tebaxê bidome û destnîşan kir ku kolan bi kolan, tax bi tax dê keda xwe ya kolektîf mezin bikin.
Rêveberiya Herêmî ya DEM Partiyê û Şaredarên DEM Partiyê yên navenda Amedê û navçeyên wê bi daxuyaniyekê starta kampanyaya “Bi keda kolektîf bajarên paqij” dan. Di daxuyaniya ku li herêma Dortyol a navçeya Rezanê hate dayîn de hate diyarkirin ku kampanya dê li hemû bajarên bakurê Kurdistanê heta 21ê Tebaxê berdewam bike. Hevşaredarên Amedê û navçeyên wê, Hevseroka DEM Partiyê ya Amedê Gulşen Ozer, xebatkarên şaredariyan û gelek kes tev li daxuyaniyê bûn. Hevşaredara Bajarê Nû Safiye Akdag metna bi zaravayê Kurmancî yê Kurdî hatibû amadekirin xwend. Hevşaredarê Rezanê Sîraç Çelîk jî metna Tirkî xwend.
‘Ji bo paqîjiyê afirandina hişmendiyê erka me hemûyan e’
Safiye Akdag di çarçoveya kampanyaya ku ji aliyê Desteya Rêveberiyên Xwecihî yên Demokratîk ve tê birêvebirin de, diyar kir ku îro li Amedê starta kampanyaya paqijiyê didin û wiha got: “Ev kampanya; ji bo me, ji bo qadên jiyana me, ji bo xwezaya me û jiyana ekolojîk xwedî girîngiyeke mezin e. Ji ber ku li ku derê dibin bila bibin, veguherîna wan qadan mîna gulistanan di destê me de ye. Em jî weke şaredarî dê di vê mijarê de berpirsiyariyên ku dikevin ser milê me bi cih bînin. Em bawer dikin ku gelê me jî dê hestiyariya ku dikeve ser milê wan nîşan bide ku qadên jiyana me paqij bimînin. Lê divê em bi vê yekê jî sînordar nemînin. Yê ku li cem me dimeşe, yê ku li pişt me rûniştiye; bi kurtî li ku derê dibe bila bibe, hişyarkirina herkesê ku Amedê qirêj dike û di vê mijarê de afirandina hişmendiyê û agahdariyê vê yekê erka me hemûyan a hevpar e.”
‘Em têkoşîneke li dijî madeyan û fihûşê jî esas digirin’
Di berdewamiya axaftina xwe de Safiye Akdag da zanîn ku ji bo bajarekî paqij pêwîst e ku xebatên xwe yên kollektif mezin bikin û wiha pê de çû: “Heke em Amedeke paqij û jiyanbar dixwazin, divê em bizanibin ku em nikarin vê yekê bi hewldana çend kesan an jî tenê bi beşên diyarkirî bi dest bixin. Em dikarin Amedeke paqij tenê û tenê wekî gelê Amedê bi hestiyariya xwe ya hevpar, keda xwe ya hevpar û refleksên xwe yên hevpar biafirînin. Îro tam ji ber vê sedemê em hatine cem hev: Ji bo ku em keda xwe ya kolektîf mezin bikin. Ji ber ku em dizanin her cure liv û tevgerên ku kolektîf in, komunal in, bi xwe re hişmendiya civaka rêxistinkirî pêş dixe. Civaka rêxistinkirî jî ne tenê civaka ku bajarê xwe paqij dike, di heman demê de civaka ku xwedî li jiyana xwe, li taxa xwe, li kolana xwe û li siberoja xwe derdikeve, ew bi xwe ye. Heke ku em civakeke rêxistinkirî biafirînin, em ê îro li Amedê neçar nemînin ku behsa qirêjiyê bikin û ne jî behsa tiryakê, madeyan hişbirê bikin. Ji ber vê yekê, dema em dibêjin ‘Bajarên Paqij’, em tenê behsa paqijiya fîzîkî ya kolan û qadên xwe yên jiyanê nakin. Di heman demê de em têkoşîneke civakî, paqijî û zelalbûnê ya li dijî madeyan û fihûşê jî esas digirin.”
‘Em ê her roj taxeke xwe paqijtir bikin’
Safiye Akdag di dawiya axaftina xwe de bal kişand ser xebatên Platforma Şiyar Be û ev tişt anî ziman: “Em jî bi wesîleya vê kampanyayê careke din diyar dikin: Li her qada ku em lê ne, em ê li dijî madeyan têkoşîna xwe mezin bikin û em ê rê nedin kesên ku gelê me bi van rêyan û cureyên din jehrî dikin. Ji vir û şûnde em ê di nav hewldanê de bin ku em Amedê ji her alî ve bikin bajarekî paqijtir, bi tendurist û jiyanewer. Dê ev hewldana me ne tenê rojêkê, dê her roj berdewam bike. Lê belê em dixwazin li vir bang li gelê Amedê ê hêja jî bikin: Em ji bîr nekin ku paqijkirina vê bajarî û paqijhiştina wê di destê me hemûyan de ye. Ne rast e ku em vê berpirsiyariyê tenê ji şaredariyê re yan jî ji kedkarên xwe yên şaredariyê re bihêlin. Wekî ferdekî, divê her yek ji me tevkariyê bide vê kampanyaya paqijiyê. Li malê ji malbata xwe re, li dibistanê ji xwendekarên xwe re, li cihê kar ji hevalên xwe re; bi kurtî li her qada ku em lê ne, divê em li hemberî mirovan hişmendî û agahdariyê biafirînin û pêş bixin. Em ê kampanyaya xwe, mîna li Amedê, li hemû herêmên Kurdistanê heta dîroka 21ê Tebaxê berdewam bikin. Ji ber vê sedemê em ê her roj li cihêkî din bin, em ê her roj taxeke xwe paqijtir bikin. Kolan bi kolan, tax bi tax em ê keda xwe ya kolektîf mezin bikin.”
Piştî daxuyaniyê girse ji herêma Dortyolê heta herêma Oryilê ya Rezane meşiya. Dû re girseyê belavok belav kir û kolan paqij kirin.
