Platforma Ked û Demokrasiyê ya Amedê diyar kir ku ji bo mafê tevahiya gel, aştî, demokrasî û jiyanek azad ew ê di 1ê Gulanê de li qadan bin.
Ji Cejna 1ê Gulanê re hefteyek ma. Sendîka û karker dest bi amadekariya 1ê Gulanê dikin. Platforma Ked û Demokrasiyê ya Amedê li avahiya Konfederasyona Sendîkayên Karkerên Şoreşger (DÎSK) a li navçeya Peyasê ya Amedê daxuyanî da û bernameya 1ê Gulanê eşkere kir. Li salona pankarta “Ji bo azadiya kedê û civaka demokratîk werin 1ê Gulan ê ” hat vekirin. Di daxuyaniyê de endam û rêveberên gelek sendîkayan amade bûn. Hevberdevka Platforma Ked û Demokrasiyê Sabahat Sever daxuyaniyê xwend.
‘Pêwîstiya me bi destpêkek nû ye’
Sabahat Sever diyar kir ku desthilatdar mafê gel binpê dike û wiha got: “Em hemû di rewşên dijwar de derbas dibin ku pêwîstiya me bi destpêkek nû heye. Ji ber ku em dibêjin welatekî ku ne tenê kar, mafên karkeran, demokrasî, dadperwerî, hiqûq bi lez û bez lê tê binpêkirin. Bi mudaxileya rasterast a li ser mafê hilbijartinan ku bingeheke civaka demokratîk e, îradeya gel tê tunekirin.”
‘Desthilatî vîna gel binpê dike’
Sabahat Sever da zanîn ku kes û aliyên ku politîkayên destikatê qebûl nakin tên girtin û wiha got: “Rêveberên herêmî ku bi îradeya gel hatine hilbijartin, bi biryarên siyasî ji kar tên dûrxistin. Desthilata ku 23 sal in li ser kar e, ji xwendekaran bigire heta rojnameger, ji şaredaran bigire heta sendîkayan û heta jinên ku ji ber bi fikrên wan ne wek yên wan in û ji ber ku polîtîkayên wan qebûl nakin, êriş li ser hemû pêkhateyan tê kirin. Bûyera tunekirina fikrên cuda û sînordarkirina azadiya ramanê bûye gefeke eşkere ku ne tenê li ser hinek beşên civakê ye lê belê li ser hemû civakê hatiye kirin.”
‘Em ê bi hev re bi ser bikevin’
Sabahar Sever bi bîr xist ku ew çi karî dikin bi êrişan re rû bi rû tên hiştin û got: “Divê em ji bo azadiyê xwe bi rêxistin bikin. Ji bo em ji vê tarîtiyê derkevin divê em têkoşînek hevpar bimeşînin. Em ê di vê pêvajoyê de ya bi hev re bi ser bikevin an jî em ê bi hev re têk biçin. Ji bo şer bê rawestandin, çareseriya demokratîk û aştiyane ya pirsgirêka Kurd pêk were û ji bo jiyanek azad werin li Qada Îstasyonê di 1ê Gulanê de li hev kom bibin.”
