Şaredariya Bajarê Mezin a Amedê belgeyên zimanên Kurmancî, Kirmanckî, Ermenkî û Sûryankî da kursiyeran. Di merasîmê de wiha hat gotin: “Ger ku Rêzdar Ocalan, tiştek wisa li dar dikeve bidîda dê gelek şanaz bibûya.”
Şaredariya Bajarê Mezin a Amedê têkildarî belgedayînên kursiyerên zimanên Kurmancî, Kirmanckî, Ermenkî û Sûryankî li navenda eywana ÇandAmedê ya navçeya Bajarê Nû ya Amedê merasîmek li dar xist. Berdevka Komîsyona Çand û Ziman a Partiya Wekhevî û Demokrasiyê ya Gelan (DEM Partî) Cemîle Tûrhalli Balsak, Berdevka Komîsyona Zarokan a DEM Partiyê û Parlamentera Mêrdînê Bêrîtan Guneş, Komeleya Çand, Ziman a Mezopotamyayê (MED-DER), Seroka Daîreya Çandê ya Şaredariya Bajarê Mezin Zeynep Yaş û malbatên kesên ku mezûn bûne beşdarî merasîmê bûn. Li salona merasîmê pankarta “Ziman şerê heyînê yê pêşîn e”, “Sibayê to bixeyr” û “Roj baş” û zimanên din hatin daliqandin. Beriya ku belgeyan bidin kursiyeran muzîkjenan bi zimanên cuda stran gotin.
Berdevka Komîsyona Çand û Ziman a DEM Partiyê Cemîle Tûrhalli Balsak kursiyerên ji zaravayê Kirmanckî mezûn bûn belge da wan û got: “Ez gelek bextewarim ku li wir belge didim.”
Parlamentera Mêrdînê Bêrîtan Guneş jî di axaftina xwe de qala şanasiya kursên zimanên cuda kir û wiha got: “Ger ku Rêzdar Ocalan, zanibûya îro li vir tiştek wisa tê lidarxistin dê gelekî kêfxweş û şanaz bibûya.”
‘Sed sal berê jî rengtir bû’
Gerînendetiya Pêşvebirina Zimanê Kurdî yê Şaredariyê Tahîr Baykûşak jî wiha got: “Ev reng sed sal berê jî li vî welatî hebû. Em ê hewl bidin van rengan nîşanî gel bidin. Lê mixabin niha yek reng hê li vî welatî pêştir e. Ji bo ku ev bername bibe alternatîfeke baş em ê xebatên xwe zêdetir bikin. Hêvîdarim ku ev bajar dîsa vegere ser kevneşopiya xwe ya berê.”
Merasîm bi dayîna belgeyan bi dawî bû.
