Li Gundê Amara yê Xalfetiya Rihayê civîna gel pêk hat. Bi sedan kesên ku di bin wêneyê Rêberê Gelê Kurd Abdulah Ocalan, Alî Haydar Kaytan û Alî Riza Altun de kom bûn, li banga Aştî û Civaka Demokratîk xwedî derketin.
Di pêşengiya TJA, DEM Partî û DBPê de li Gundê Amara yê Xalfetiya Rihayê civîna dawî ya gel pêk hat. Civîna ku bi perspektifa Aştî û Civaka Demokratîk li Amarayê pêk hat bi sedan kes beşdar bûn. Civîn li mala ku Rêberê Gelê Kurd Abdullah Ocalan lê ji dayik bûye pêk hat. Di civînê de posterên mezin ên Rêberê Gelê Kurd Abdullah Ocalan, pêşengên PKKê Alî Haydar Kaytan û Alî Riza Altin hatin daliqandin. Dîsa pankarta mezin a “Em rêya diçe aştiya bi rûmet silav dikin” vekirin. Di civînê de Aktîvîsta TJAyê Sabahat Tuncel, Parlamenterên DEMê Dilan Kunt, Omer Ocalan, Ferît Şenyaşar, Endamên Meclisa Dayikên Aştiyê, birayê Abdullah Ocalan Mehmet Ocalan, Hevberdevka Komîsyona Hiqûqê ya DEM Partiyê Sevda Çelik Ozbîngol, nûnerên saziyên civakî amade bûn.
Civînê bi rêzgirtinê û temaşekirina sînevîzyona Aştî û Civaka Demokratîk dest pê kir. Dema sînevîzyon hat temaşekirin bê navber dirûşmeyên “Bijî Serok Apo” û “PKK gel e, gel li vir e” berz kirin.
Hanîfî Eser ê piştî 30 salan girtî ma û hat berdan, di civînê de axivî û got: “Vê tevgera ku bi 6 kesan dest pê kir, îro tenê di civîna li gundekî de be sedan kes beşdar dibin. Îro tevgera Kurdan li cîhanê belav bûye. Ji ber ku Kurd hem baş şer dikin û hem baş siyasetê dikin. PKK xelas nebûye û dê xelas nebe. Ji ber ku ew jiyan e. Jiyan tu carî naqede.”
Aktîvîsta TJAyê Sebahat Tuncel jî anî ziman ku Rêberê Gelê Kurd Abdullah Ocalan bi dehan caran ji bo aştiyê bang dike û got: “Herî dawî di 2015an de pêvajoyek hat destpêkirin, lê vê carê mase ji holê rakirin. Li şûna axaftina kolanan qeyûm tayînî şaredariyan kirin. Her kes dibêjin ‘Em bi dewletê bawer nabin. Raste. Lê em bi xwe bawer in.”
