Kurd û dostên kurdan li gelek welatên Ewropa, Tirkiye û Kurdistanê 26emîn salvegera komploya navneteweyî şermezar kirin. Bi deh hezaran kurd û dostên kurdan ku li dehan navendan kom bûn, bi meş û mîtîngên girseyî bertekên xwe yên li dijî komployê anîn ziman û destnîşan kirin ku dê azadiya fizikî ya Abdullah Ocalan mîsoger bikin.
Strasbourg
Gelê Kurd û dostên wan ên li Strasbourgê li hev civiyan, ji bo azadiya Rêberê PKKê Abdullah Ocalan bang kirin. Çalakvanan bal kişand ser rola Abdullah Ocalan a têkildarî çareseriya pirsgirêka kurd û gotin ku divê têkiliya Rêber Abdullah Ocalan a bi gelê kurd û tevgerê re were avakirin. Parlamentera Partiya Keskan a Fransayê Sandra Regol di mitîngê de axivî û got: ‘’Ez piştgiriyê didin berxwedanê. Divê Ocalan azad be. Me hemû caran piştgirî da berxwedana we û ji nija û şûnde jî em ê piştgirya xwe bidomînin. Ocalan azad wê pirsgirêka Kurd jî çareser bibe. Mafê hemû gelan ê jiyan û diyarkirina çarenûsa xwe heye.’’
Erîvan
Li Êrîvanê komploya 15ê Sibatê hate protestokirin û girseyê bang li NY’ê kir ku ji bo azadiya Rêberê PKKê Abdullah Ocalan berpirsiyariyên xwe bi cih bîne. Meşê li Qada Azadiyê dest pê kir û heya pêşiya Neteweyên Yekbûyî (NY) dewam kir. Li pêşiya NY’ê Rojnamevan Lianna Mihoyan û Hevserokê Komîteya Kurdistanê Silo Dirboyan axivîn û kompo şermezar kirin.
Roma
Li paytexta Îtalya Romayê ji bo protestokirina Komploya 15ê Sibatê ya li dijî Rêberê PKKê Abdullah Ocalan meşek hat lidarxistin. Gelê Kurd û dostên wan ên Îtalî ku li qada Piazzale Ugo la Mafa li hev civiyan, bi meşa sê saetan hatin pêşiya Komeleya Çand a Ararat û li vir daxuyanî dan.
Bruksel
Li Brukselê jî bi heman armancê meş û mîtîng hat li darxistin. Endamê Heyeta Îmraliyê ya serdema berê Îdrîs Balûkên di mitînga Strasbourgê ya bi wesîleya salvegera 26emîn a Komploya Navneteweyî ya li dijî Rêberê PKKê Abdullah Ocalan hate lidarxistin de axivî û anî ziman ku bi wêneya ku li Strasbourgê derket, komplo têk çû. Îdrîs Balûkên bi bîr xist ku tê xwestin îradeya rêberê gelên bindest Abdullah Ocalan were şikandin û anî ziman ku komplo bi berxwedana îradeyê re ku komplogeran hesab nedikirin, hat têkbirin.
Dêrazorê
Bi sedan şêniyên kantona Dêrazorê, rûspiyên eşîran, endamên saziyên sivîl, leşkerî, partiyên siyasî, rêxistinên jin û ciwanan bi meşeke girseyî Komploya Navneteweyî ya li dijî Rêberê PKKê Abdullah Ocalan şermezar kirin.
Êlih
Bi boneya komploya navneteweyî li Êlihê meş hate lidarxistin. Bi sedan kesên li Parka Yilmaz Guney hatin gel hev, pankarta “Em ê roja reş veguherînin roja azadiyê” hilgirtin. Nûnerên rêxistinên civaka sivîl û partiyên siyasî tev li meşê bûn û beriya meşê daxuyanî hate dayin.
Stenbol
TJA û dayikên aştiyê bi heman armancê daxuyanî dan. Di daxuyaniyê de bang li raya giştî kirin ku têkoşînê mezin bikin û gotin: “Tarîtiya faşîzmê bişkînin û ji bo azadiya fîzîkî ya Birêz Ocalan hêviya aştiyê hembêz bikin” Aktîvîstên TJA li Qada Azadiyê ya navçeya Bakirkoyê ya Stenbolê daxuyaniyeke çapemeniyê dan û komplo şermezar kirin.
