Amed-Konservatuvara Bajêr a Aram Tîgran, di sala ewil de di beşa şano, sînema û muzîkê de 440 xwendekar perwerde kir.
Şaredariya Bajarê Mezin a Amedê Konservatuvara Bajarî ya Aram Tîgran, di sala xwe ya ewil de perwerdeya şano, sînema û muzîkê da 440 xwendekaran. Konservatuvara ku ji ber serdema havînê dê di dawiya meha hezîranê de navberê bide perwerdeyê, piştî çalakiya dawiya salê ya ku dê di 29ê hezîranê de li dar bixe, armanc dike ku di serdema nû de yanî di meha Îlonê de dest pê bike, di heft beşên cihê de perwerdeyê bide.
Berpirsê Konservatuvarê Ferhat Ertaş daxuyand ku bi serlêdanên serdema nû re dê di heft beşên cihê de perwerde bê dayîn û destnîşan kir ku bi serlêdanên ku di meha Îlonê de hatine girtin re, perwerde hem ji bo zarokan hem jî ji bo mezinan hatine destpêkirin.
Ertaş da zanîn ku di sala yekem a perwerdeyê de ji bo mezinan di çar beşên sereke de (şano, sînema, muzîk û ziman û wêjeya Kurdî) perwerde hatiye dayîn û di vê çarçoveyê de 310 ciwanan ji perwerdeya konservatuvarê sûd wergirtiye û destnîşan kir ku ji bo 130 zarokên ku temenê wan di navbera 6 û 13 saliyê de ne jî perwerdeya bingehîn a muzîkê hatiye dayîn.
Dê di heft beşan de perwerde bê dayîn
Ertaş diyar kir ku di dawiya meha Hezîranê de dê navber ji bo perwerdeyan bê dayîn û anî ziman ku dê di beşên muzîk, şano, sînema, ziman û wêje, wêne, govend, anîmasyonê de perwerde bên dayîn.
Ertaş anî ziman ku di meha Îlona sala 2026an de serdema nû ya perwerdeyê dê dest pê bike û bal kişand ser wê yekê ku ew armanc dikin li Amedê di asta akademîk de konservatuvarekê ava bikin û ev tişt vegot: “Armanca me ew e ku wekî piştgirî bidin pisporbûna wan welatiyên ku dixwazin xwe di warên çand, huner û ziman de pêş bixin. Di heman demê de em armanc dikin hunermendên jêhatî yên ku dê berhemên mayînde ji paşerojê re bihêlin, perwerde bikin.”
Her wiha Ertaş diyar kir ku konservatuvar di serdema nû de dê bi bernameyên perwerdeyê yên berfirehtir xebatên xwe bidomîne.
