Komeleya Avesta ji bo zimanê kurdî bibe zimanê fermî daxuynî da û got, “Astengkirina zimanê kurdî xizmetê ji armanca aştî û xwişk-biratiyê re nake, bêhtir şik û gumanên gelê kurd mezintir dike.”
Komeleya Lêkolînên Çand û Ziman Avesta ji bo zimanê kurdî bibe zimanê fermî û zextên li ser çand û zimanê kurdî raweste li li navçeya Konak a Îzmîrê daxuyanî da çapemeniyê. DBP, DEM Partî, Komeyala Çand û Hunerê ya Azad, Komeleya Elewiyên Demokratîk û ANYAKAY DER tevlî daxuyaniyê bûn.
Daxuyanî ji aliyê Hevseroka Avestayê Kurdiye Irgat ve hate xwendin. Daxuyanî wiha ye:
“Di danezanîna mafê mirovan de piştî mafê jiyanê, mafê zimanê dayikê ye û ew maf jî mafê herî meşrû û rewa ye. Lewre zimanê dayikê bi tu awayî nayê mûnaqeşekiriın û çi şert û merc dibin bila bibin tu carî ev maf nayê astengkirin û nayê qedexekirin.
Ji damezirandina komara Tirkiye yê heya roja me ya îro tevî ku gelê kurd jî li gel gelê tirk di ber vê komarê de xwîna xwe rijandiye, lê mixabin mafên wî yên mirovî di asta herî kêm de jî nehatine dayîn û nehatine parastin.
Berevajî vê yekê, ji bo jiholêrakirina çand û zimanê gelê kurd her cûre pişaftin û helandin li ser hatiye meşandin. Ji bo vê armancê, her rê û rêbazên tunkirinê hatine bikaranîn. Dîroka Kurdan hatiye înkarkirin, erdnîgariya Kurdistanê û çanda kurdî hatiye talankirin û wêrankirin.
Îro di vê sedsala 21an de ku mirov çûne fezayê, lê mixabin li Tirkiyeyê hîna dayikek kurd nikare li cihekî fermî bi zimanê xwe biaxive û derdê xwe bîne ziman.
Cihê şermezariyê ye, komîsyona ku ji bo çareserkirina pirsgirêka kurd hatiye damezirandin de, axaftina dayikek kurd hatiye qedexekirin. Bi vê helwesta şaş û çewt tu baweriyê nade gelê kurd.
Lewre zimanê dayîkê mafê herî bingehîn e, heke bi vî awayî tevdigerin, wê karibin çi çareser bikin gelo?
Di vê pêvajoya îro ku wekî pêvajoya aştî û xwişk-biratiyê tê binavkirin de, helwestên ku tên nîşandan xizmetê ji armanca aştî û xwişk-biratiyê re nake, bêhtir şik û gumanên gelê kurd mezintir dike, ewletiya wan bi vê pêvajoyê qels dike û ji samîmiyetê dûr dixîne.
Ji bo ev pêvajoya ku tê meşandin biserbikeve û bighêje aramanca xwe, divê teqez û demlideste xwestek û daxwazên gelê kurd bînin ceh, ku ev xwestek hemû jî mafên rewa û mirovine, em van mafan bî vî awayî em dikarin bi rêz bikin:
1- Bila zimanê kurdî bibe zimanê fermî
2- Bila hemû zext û astengiyên lî ser çand û zimanê kurdî bên rakirin
3- Bila ji asta seretayî heya zanîngehê perwerdehî bi zimanê kurdî bê dayîn.
Em jî weke komeleya lêkolînên çand û ziman Avesta, van xwestekên gelê kurd di cih de dibînin û em bangî rayedarên dewletê dikin û dixwazin ji bo vê yekê bikevin nava hewledanan û çi pêwîst be bê kirin.”
