Komeleya 78an 7emîn Kongreya xwe ya asayî li Şaxa 1emîn a Egîtîm Senê ya Amedê pêk anî.
Di kongreya de nûnerên gelek saziyên civakî amade bûn. Li salona kongreyê pankarta “Divê zindana Amedê bibe muzeya mirovahiyê” vekirin. Kongreyê bi rêzgirtinê dest pê kir û bi hilbijartina dîwan berdewam kir. Ji bo dîwana kongreya 78an siyasetmedar û nivîskar Hasan Ozguneş, Nivîskar Haci Ozkal û Prz. Gulşen Demîr hatin hilbijartin. Piştî dîwana kongreyê hat hilbiartin, li ser navê dîwanê siyasetmedar Hasan Ozguneş axaftinek kir.
Dema xwerêxistinkirinê ye
Hasan Ozguneş anî ziman ku ev kongre ji bo keda borî biparêze û rêveberiyek çawa bê sazkirin hilbijêre pêk tê û wiha got: “Dê bi ruhekî nû, rê û rêbazên nû xwe bi rêxistin bike. Li gorî demê xwe bi hêz bike. Dê li ser armanc û rêgezên xwe bimeşe. Wekî tê zanîn DEM Partî û DBPê li ser daxwaza hemû sazî û rêxistinan konferans pêk anî. Di encama vê konferansê de hamleya xwe ji nûve avakirinê ya partî û rêxistinan hat destpêkirin. Di konfrenasê de hat xwestin hemû sazî xwe ji nûve ava bikin û hamleya xwe ji nûve avakirinê hatiye destpêkirin. Ev hamle ne tenê ya partiya siyasî ye. Ev hamle di heman demê de ya saziyan û gelan e jî.”
Hasan Ozguneş li ser armanca xwerêxistinkirinê jî rawestiya û wiha axivî: “Çima pêdivî bi xwe avakirinê heye? Em tev dibînin li Rojhilata Navîn çi diqewime. Em baş dizanin projeya ku dewletên Moderniteya Kapîtalîst dane pêşiya xwe 30 salin li Rojhilata Navîn tê meşandin. Yek ji xeleka wê Sûrî bû. Rejîma ku zêdeyî 60 salin li ser dîktatoriyê ava bûbû hat hilweşandin. Çend armancên vê projeya dewletan heye.”
Hêzên kapîtalîst her dem qeyranê zêde dikin
Ozguneş armancên dewletan yên li ser Rojhilata Navîn wiha rêz kir: “Yek ji daxwazên dewletên Modernîteya Kapîtalîst ew e ku pergal û rêveberiyên ku li dijî vê projeye serê xwe netewîne, wan hilweşînin û piştre bi xwe ve girê bidin. Ya duyemîn ewlehiya Israîl e û ya sêyemîn jî dewlemendiya van welatan têxin kontrola xwe. Yên din jî dixwazin her tim li Rojhilata Navîn qeyran hebe. Ji bo Modernîteya Kapîtalist çiqas di navbera bawerî, ol, çand û nasnameyan de qeyran hebe ew qas ji bo wan baş e. Ji ber vê yekê naxwazin aramî pêş bikeve.”
Çareserî Neteweya Demokratîk e
Hasan Ozguneş li ser çareseriya pirsgirêkan jî rawestiya û wiha got: “Li dijî vê yekê çareserî Neteweya Demokratîk, rêveberiya xweser û konfederal ji bo Rojhilata Navîn bûye derman. Nakokî û neheqiya di navbera zayend, çîn, bawrî û mirov û xwezayê de ji holê radike. Hevsengiyê û çareseriyê pêş dixe. Di aliyê sincê civakî de pêşketinê ava dike. Hemû bawerî, çand, ziman û nasname dikarin bi hevre azad bijîn. Gelê Kurd îro vê pergalê ava dikin û mînaka vê yekê jî Rojava ye. Dewletên metînger û hikûmeta Tirk ji ber vê yekê êrîş dikin û dixwazin destkeftiyên Kurdan tune bikin. Îro dorpêç û tecrîda li ser Rêberê Gelê Kurd Abdullah Ocalan zêde dikin. Sed sal bere di peymana Lozanê de em nezan bûn yekîtiya me tune bû. Em bê rêxistin bûn. Lê niha şerê sêyemîn heye. Li ser Kurdan heman polîtîka tê meşandin. Lê vê carê em zane ne. Polîtik bûne. Pergalek me heye. Modelek me heye. Divê em bêtir xwe bi rêxistin bikin û ji nûve ava bikin.”
Kongre piştî axaftinan bi raporên maliye û xebatê berdewam kir. Piştî xwendina raporan, hilbijartin pêk hat. Di hilbijartinê de ji bo rêveberiya Komeleyê Ahmet Candan, Gulseren Aydemîr, Enver Temîz, Bedrî Karaoglan, Mehmet Yamaç, Sanayî Çelîk û Talhat Emra hatin hilbijartin.
