Endamên Komîsyonê yên DEM Partiyê piştî pejirandina rapora hevpar daxuyaniyeke dan û destnîşan kirin ku ji niha şûn ve pir girîng e û gotin divê pêşniyarên rapora hevpar demildest bibin qanûn.
Komîsyona Meclîsê civîna xwe ya dawî ango civîna 21an li dar xist. Di encama civînê de rapora hevpar bi deng dayînê hate pejirandin. Ji 51 endamên komîsyonê 47 encaman weke “erê” deng dan. 2 kesan neyînî deng da û kesek jî ne erênî û ne jî neyînî deng da. Bi vî awayî rapora hevpar hat qebûlkirin. EMEP û TÎPê bi awayekî neyînî deng bikaranîn. Endama Komîsyonê ya CHPê Turkan Elçî jî ne erênî û ne jî neyînî deng bikar neanî. DEM Partî, MHP, AKPê û Koma Yenî Yol û endamên din ên CHPê weke “erê” deng dan. Piştî qeûlkirina rapora hevpar xebatên Komîsyonê bi dawî bû.
Endamên komîsyonê yên DEM Partiyê piştî pejirandina raporê daxuyanî da. Serokwekîla Koma DEM Partiyê Gulistan Kiliç Koçyîgît bi lêv kir ku tevî kêmasiyan jî Komîsyona Meclîsê erka xwe bikar aniye û wiha got: “Xalên 6 û 7 pirr girîng in. Ji niha şûn ve pirr girîng e. Divê Meclîs ji niha şûn ve pêşniyarên qanûnan ku di rapora hevpar de cih girtine bi awayekî lezgînî bike qanûn.”
‘Bi gotina terorê em nikarin bi pêş ve biçin’
Koçyîgît li ser pirsa derbarê peyama Rêberê Gelê Kurd Abdullah Ocalan de ev bersiv da: “Birêz Ocalan banga 27ê Sibatê ya Aştî û Civaka Demokratîk kir. Birêz Ocalan aktorê herî sereke yê pêvajoyê û aştiya herêmî ye. Em ji nêrîn û pêşniyarên birêz Ocalan cuda nafikirin. Pirsgirêkeke dîrokî ye. Aliyên wê yên siyasî, aborî, çandî û hiqûqî hene. Ji bo çareseriya van gav hatine avêtin. Ji bo wê jî divê em zimanê xwe jî rast bikin. Bi gotina ‘terorê’ em nikarin bi pêş ve biçin.”
‘Niha dema çêkirina qanûna e’
Endama Komîsyonê Meral Daniş Beştaş jî destnîşan kir ku erêkirina rapora hevpar dîrokî ye û wiha got: “Bi 47 dengan qebûlkirina raporê pirr girîng e. Ev jî nîşan dide ku bi milyonan kes piştgiriya pêvajoyê dikin. Ji bo pêkanîna biryarên Dadgeha Mafê Mirovan a Ewropayê, daxwaza avakirina mekanîzmayeke pir girîng bû. Her wiha pênaseya azadiya raman û fikir di çerçoveya ‘terorê’ de nayê binavkirin. Ji bo hiqûqa Tirkiyeyê pirr girîng e. Yek jî xala girîng ji bo mafê hêviyê ye û penaseya berdana bi şert e. Divê aktorê serekê yê pêvajoyê birêz Ocalan bi awayekî azad bikaribe bixebite. Ji niha şûn ve divê êdî xebatên qanûnî demildest bên kirin.”
