KNKê êrişa li ser pêşmergeyên Başûrê Kurdistanê şermezar kir û ev bang kir: “Şerê xwe neynin welatê me û êrişên xwe yên ser welatê me rawestînin. Mafê me yê bersivdayînê heye û gelê Kurd wê xwe biparêze.
Konseya Rêveber a Kongreya Neteweyî ya Kurdistanê (KNK) têkildarî şehîdbûna 6 Pêşmergeyên Herêma Kurdistanê daxuyaniyeke nivîskî da.
Daxuyanî wiha ye:
“Êrişên Îranê û yên komên çekdarên nêzîkî Îranê yên li ser Herêma Kurdistanê dewam dikin. Di vê çarçoveyê de doh bi şev gelek caran êrişî Herêma Kurdistanê hate kirin. Bi vê ve girêdayî serê sibehê Îranê bi fuzeyan êrişî hêzên pêşmergeyên Herêma Kurdistanê kir. Êriş li sînorê Xelîfanê yê ser bi Îdareya Soranê ya parêzgeha Hewlêrê pêk hat. Di encama êrişê de 6 Pêşmerge şehîd bûn û 30 Pêşmerge jî birîndar bûn.
Em KNK vê êrişa hovane û hemû êrişkaran bi tundî şermezar û mehkûm dikin. Ji şehîdan re rehmetê, ji birîndaran re şifayê, ji malbatên şehîdan û ji hemû gelê Kurdistanê re sersaxiyê dixwazin.
Em Kurd terefê vî şerî nînin lê mixabin ji despêka şer ve, gel û welatê me di bin êrişan de dimîne. Bi vê munasebetê em carekî din bang li aliyên şer dikin û dibêjin, şerê xwe neynin welatê me û êrişên xwe yên ser welatê me rawestînin. Mafê me yê bersivdayînê heye û gelê Kurd wê xwe biparêze. Her wiha divê Hikûmeta Iraqê li hember van êrişan bê deng nemîne û hem çekdarên nêzîkî Îranê rawestîne û hem li hember êrişên Îranê tedbîrên pêwîst bigre.
Her çend em ne alîgirê vî şerî bin jî, lê êriş li ser welat û gelê me têne kirin. Divê em Kurd li hember van êrişan xwe biparêzin, hêza parastinê mezin bikin û yekîtiya xwe xurttir bikin. Parastina Başûrê Kurdistanê parastina hemû Kurdistanê ye. Em ê bi hemû hêza xwe, destkeftiyên Başûrê Kurdistanê biparêzin.”
