Hevseroka DBPê ya Giştî Çîgdem Kiliçgun Ûçar destnîşan kir ku mafê hêviyê ji bo entegrasyona demokratîk pêk were mifteyeke girîng e û wiha got: “Ev îrade dibêje ku ‘divê Rêberê Gelê Kurd Birêz Abdullah Ocalan azad bibe û di şertên azad de bixebite’.”
Di pêşengtiya Platforma Saziyên Demokratîk de bi dirûşma “Em ji bo mafê hêviyê yê Rêber Apo ber bi azadiyê ve dimeşin” ji ber Zîndana Amedê ya li navçeya Rezan a Amedê heta dawiya Cadeya Emekê ya navçeya Rezanê meşek hate lidarxistin.
Hevseroka Partiya Herêmên Demokratîk (DBP) a Giştî Çîgdem Kiliçgun Ûçar, parlamenterên DEM Partiyê, hevşaredar, aktîvîstên TJAyê, Dayîkên Aştiyê endam û rêveberên partiyên siyasî, sazî û dezgehên sivîl û bi hezaran kes beşdarî meşê bûn.
Girseya ku li ber Zindana Amedê kom bû dirûşmên “Bijî Serok Apo” û “Jin jiyan azadî” berz kir û li ber stranên hatin li dar xistin govend gerand. Di meşa ku ji ber Zindana Amedê dest pê kir de bi kurdî û tirkî pankartên “Ji bo Mafê Hêviyê yê Rêber Apo Em ber bi Azadiyê ve dimeşin“ , “Kurd rabûne ji xewa giran ji bo azadiya Ocalan” , “Ji bo aştiyeke mayînde ji Rêbertî re azadî û dowîzên “Azadî hêvî ye, hêvî li Îmraliyê ye” , “Mafê hêviyê mafê jiyanê ye, Nikare teslîm bê girtin” , “Ji bo çanda Kurdî azadî” , “Ji bo nasnameya Kurdan statu” , “Aştî dê bi destê jinan were” hatin hilgirtin. Di tevahiya meşê de dirûşmên “Bijî Serok Apo” , “Bê Serok Jiyan Nabe” , “Jin jiyan azadî ji Rêbertî re azadî” hatin berz kirin û gelek alên ku wêneyê Rêberê Gelê Kurd Abdullah Ocalan li ser hatin hilgirtin. Her wiha jinan aleke mezin ku “Jin jiyan azadî” li ser dinivîsî hilgirtin.
Bi hezaran kesên ku gihiştin dawiya Cadeya Emekê li vir jî dirûşma “Bijî Serok Apo” berz kirin, li çepikan dan û lîlandin. Meş da heta li ber AZC Plazayê ya li Semta Ofîsê ya navçeya Yenîşehîrê bê lidarxistin lê polîsan bi hinceta di meşê de gelek posterên Rêberê Gelê Kurd Abdullah Ocalan hatin hilgirtin meş astengkirin. Li ser vê yekê piştî meşê li dawiya Cadeya Emekê axaftin hate kirin.
‘Gel xwedî li vîna xwe derket û got birêz Ocalan aktorê sereke ye’
Hevseroka DBPê ya Giştî Çîgdem Kiliçgun Ûçar bal kişand ser dirûşmên ji bo Rêberê Gelê Kurd Abdullah Ocalan hatin berzkirin û wiha got: “Em ji kesên ku destûr nedan posterên birêz Ocalan re dibêjin ku em destê dayîkên me û destê her kesên ku ew poster rakirin maç dikin. Gelê me yê ku xwedî li vîna xwe derket dibêje ku di çareseriya pirsgirêka Kurd a demokratîk de birêz Ocalan aktorê sereke ye. Divê ev meş kesê netirsîne, ev meş bidawîkirina êşan e.”
‘Birêz Ocalan ji bo çareseriyê hemû derfet pêşkeşkirin’
Çîgdem Kiliçgun Ûçar di berdewama axaftina xwe de ev tişt gotin: “Binêrin bi ser 1ê Cotmehê re salek derbas bû, pêvajo di 27ê Sibatê de bi Banga Aştî û Civaka Demokratîk a Birêz Ocalan re dest pê kir. Ji bangê heta niha çareseriyên tevgera Kurd û birêz Ocalan qet xelas nebûn. Birêz Ocalan bi gel û rêxistina xwe re hemû derfet pêşkeşkirin. Komîsyona li Meclisê bi israr û îradeya birêz Ocalan hate avakirin. Tişta herî girîng ew e ku bi birêz Ocalan re hevdîtinê bikin. Kesên ku nedihatin cem hev di komîsyonê de hatin cemhev û di çareseriya meseleya Kurd a dîrokî de bûn xwedî gotin. Divê qiymetê vê yekê were zanîn.”
‘Birêz Ocalan bi pêkanîna mafê hêviyê dikare azad bibe’
Çîgdem Kiliçgun Ûçar bi bîr xist ku bi ser biryara Dadgeha Mafên Mirovan a Ewropayê (DMME) ya têkildarî mafê hêviyê de 11 sal derbas bûn lê di vê pêvajoyê de tu gav nehatin avêtin û wiha domand: “Birêz Ocalan bi pêkanîna mafê hêviyê dikare azad bibe. Birêz Ocalan dibêje em nebêjin mafê hêviyê bêjin dengê hêviyê. Mafê hêviyê ji bo entegrasyona demokratîk pêk were mifteyeke girîng e. Serdemeke nû bi pêkanîna mafê hêviyê pêkan e. Kesên navê vê pêvajoyê dikin ‘xwişk û biratî’ destûrê nadin vê meşê. Em ji wan dipirsin; hûn ê heta kengî birêz Ocalan ji nedîtive werin. Birêz Ocalan aktorê sereke yê vê pêvajoyê ye û nikare di girtîgehê de bê ragirtin. Birêz Ocalan li dijî cezakirinê Girava Îmraliyê kiriye Girava Aştiyê. Ev îrade teyîsîna îradeya li Girava Îmraliyê ye.”
Çîgdem Kiliçgun Ûçar diyar kir ku biryara Konseya Ewropayê ji bo mafê hêviyê bide dê were aşkere kirin û wiha pê de çû: “Divê ev biryar ji bo demokrasiya Tirkiyeyê bibe piştgirî. Pêdiviya me bi serdemeke nû heye. Navê vê serdema nû pêvajoya Aştî û Civaka Demokratîk e û aktorê sereke Rêberê Gelê Kurd Birêz Abdullah Ocalan e.”
‘Pêvajo dê bi azadiya me hemûyan bi encam bigire’
Çîgdem Kiliçgun Ûçar axaftina xwe wiha bi dawî kir: “Ev îrade dibêje ku ‘Divê Rêberê Gelê Kurd Birêz Abdullah Ocalan azad bibe û di şertên azad de bixebite.’ Em bi pêvajoyeke ku ji bo berjewendiyên tu kesê neyê pûçkirin re rûbirû ne. Dayikên me yên hêja yên tevî her tiştî dest ji bilindkirina têkoşînê bernedan, ciwanên me yên ala têkoşînê hildigirin, hevalên me yên kedkar em saya we li vir in. Bi saya her yekê ji we wê ev pêvajo bi azadiya me hemûyan bi encam bigire.”
Meş bi axaftina Çîgdem Kiliçgun Ûçar bi dawî bû.
