KNK’yî seba pîrozkerdişê Newroze veng da û vat: “Vengdayîşê ma o yo ke heme Kurdîstanijî, bi reng, sembol û nasnameyê xo, mil bi mil û dest bi dest, Newroza 2026î bikerê Newroza Azadîye û yewîya xo.”
Konseya Rayberîya Kongreya Neteweyî ya Kurdîstanî (KNK) bi eşkerayîyêka nuştekî vengdayîşê pîrozkerdişê Roşanê Newroze kerd û dîyar kerd ke ganî şarê kurdî Kurdîstan û pêroyê dinya de bi îrade û yewîyêka xurte pîya Newroze pîroz bikerê ke mesajê azadîye û yewbîyayîşî biresnê heme dinya.
Tedeyîya eşkerayîya KNK’yî wina ya:
“Kongreya Neteweyî ya Kurdîstanî (KNK) veng da heme partî, rêxistine, sazgehê komelkî, kesayet û şaranê kurd ê her çar hetanê Kurdîstanî û teberê welatî ke ma Newroza serra 2026î bi ruhêko niştîmanî û bi hesasîyetêko berz, bi sloganê “Newroza Azadîye û Yewîye” pîya pîroz bikerê û wayîrê destkewteyanê şarê xo vejîyê û pawitişê xoverdayîşê Rojavayî bikerê.
Ma hêvîdar ê ke emserr şaristanê Frankfurt û heme welatanê Ewropa û dinya de zî şarê ma pîya Newroze pîroz bikero. Lazim o ma bi îrade û yewîyêka xurte pîya Newroze pîroz bikerê ke ma reyna îradeyê şarê xo heme dinya rê bimojnê û mesajê azadîye û yewîya xo biresnê dinya.
Vegdayîşê ma o yo ke heme Kurdîstanijî bi sembol û nasnameyê xo, mil bi mil û dest bi dest, Newroza 2026î bikerê Newroza Azadîye û yewîya xo. Şertê herême û qonaxo ke têgêrayîşê sîyasî yê Kurdîstanî tede yê, berpirsîyarîyêka pîle kena milê ma hemeyan ser o. Nê semedî ra ma reyna vengdayîşê xo tekrar kenê ke bi yewrêzî û caardişê yewîya xo, ma eşkenê hêzê şarê xo zafêr bikerê û amancanê xo bîyarê ca.
Dem, demê yewrêzî û caardişê yewîye yo
Biciwîyo Newroza azadîye û yewbîyayîşî yo.”
