Temsîlkarîya KNK’yî ya Rojavayî bi munasebetê 1ê teşrîna peyêne, Roja Kobanî ya Dinya, eşkerayîyêk daye. KNK’yî wina va: “Azadkerdişê Kobanî tena serkewtişêko eskerî nêbî. No hedîseyêko sîyasî, akademîk û tarîxî bî ke tarîxê Rojhelato Mîyanên û mucadeleyê merdimîye de bî noqtaya çarnayîşî.”
Temsîlkarîya Kongreya Neteweyî ya Kurdîstanî (KNK) ya Rojavayî bi munasebetê 1ê teşrîna peyêne, Roja Kobanî ya Dinya, eşkerayîyêka nuştekî daye.
KNK’yî bale ante neticeyanê xelesnayîşê Kobanî ser û wina va: “Bi munasebetê 1ê teşrîna peyêne, Roja Kobanî ya Dinya, ma sey Kongreya Neteweyî ya Kurdîstanî (KNK) bi germî xoverdayoxanê Kobanî, keyeyanê şehîdan, şervananê YPG/YPJ’yî û heme şarê Kobanî û Rojavayî pîroz kenê. Azadkerdişê Kobanî tena serkewtişêko eskerî nêbî. No hedîseyêko sîyasî, akademîk û tarîxî bî ke tarîxê Rojhelato Mîyanên û mucadeleyê merdimîye de bî noqtaya çarnayîşî.”
KNK’yî dewamê eşkerayîya xo de îfade kerd ke neticeyê Kobanî nîşanê xurtbîyayîşê paradîgmaya Neteweya Demokratîke yê. KNK’yî wina va: “Kobanî îspat kerd ke paradîgmaya netewe-dewlete şikîyaye û paradîgmaya Neteweya Demokratîke ser kewte. Kobanî de bi pêşengîya cinîya rêxistine terorîste DAÎŞ ameye şikitiş. Hêzanê herêmkî û mîyanneteweyî piştî dayêne DAÎŞ’î. Kobanî mojna ke îradeya şarê organîzekerdeyî heme çekanê modernan û ordîyanê pîlan ra xurtêr a. Kobanî dinya rê va ke kurdî tena eşkenê xo bipawê ney, eşkenê seba Sûrîyeyêka newe û Rojhelatêko Mîyanên ê demokratîk alternatîfêko demokratîk zî awan bikerê.
Xoverdayîşê Kobanî tezê klasîkî yê zanistanê sîyasîyan ê derheqê têkilîya hêz û meşrûîyetî de newe ra tarîf kerdî. Kobanî pratîk de îspat kerd ke teorîya xopawitişê meşrûyî û cuyayîşê pîyayî yê şaran ûtopya nîya. Na teorî eşkena bibo raştîyêka ganîye.”
KNK’yî bale ante îradeya mucadeleyê cinîyanê kurdan ser û wina dewam kerd: “Kobanî de dinya bi çimanê xo dî ke cinîya kurde senî heme bend û qeydê komelê patrîarkal û kehenperestî şikitî. Cinîya kurde êdî qurbana keyeyî ya nimitiye nêbî. A bîye fermandare, bîye şervane, bîye sembolê azadîye. Aye qîrayîşê azadîye yê cinîyanê dinya berz kerd.
Cinîya kurde rêzanê YPJ’yî de bi wêrekî û bawerîyêka bêmîsale vera wehşetê DAÎŞ’î şer kerd. DAÎŞ dişmenê heme cinîyan bî. Ey cinî kerdêne kole û bazaran de rotêne. Cinîya kurde bi qehremanîya xo heyfê her cinîya dinya girewt ke ameya zulmkerdiş, tecawizkerdiş û kiştiş. Aye tena seba Kobanî ney, seba her cinîya dinya şer kerd û şerefê heme cinîyan pawit.”
KNK’yî derheqê muhîmîya xoverdayîşê Kobanî de nê çîyî vatî: “Kurdî şarêko azad ê. Ma şarêk ê ke verê tu zulm, îşxalkarî û koleyîye de sereyê xo xwar nêkenê. Ma do erdê xo ser o azad bicuyê yan zî rayîrê azadîye de bibê şehîdî. No mesajê pî û kalanê ma yo û no sozê ma yo seba nesilanê ke yenê. Coka azadkerdişê Kobanî tena azadkerdişê şaristanêk nêbî, azadkerdişê şerefê merdimîye bî.
Ewro ma serrûmera azadkerdişê Kobanî de reyna qetî kenê ke pawitişê qezencanê Kobanî wezîfeya neteweyî ya heme kurdan a. Yewîya neteweyî garantîya daîmîbîyayîşê Kobanî ya.”
